KHAWTHLIR

Fisheries minister K Lalrinliana chuan nimin khan Kolasib Khuangpuilama Fish Food Processing Centre a tlawh a, kum 2013-a siam tawh, tun thlenga hman theih loha a la awm chhan chu Fisheries joint director Vanlallawma leh a thawhpuite'n an sawifiah. K Lalrinliana chuan, khawl tinunga sangha chaw her chhin turin thawktute a hrilh.

PRISM party chuan The Citizenship (Amendment) Bill, 2016 dodalna kawngah awmze nei zawka hmalak a nih theih nan chief minister Zoramthanga chu all party meeting ko turin an ngen a; nimin khan Chief Minister hnenah lehkha an thehlut a ni.

Economics & Statistics department chuan Thawhlehni leh nimin khan Lawngtlai DRO conference hall-ah LADC area-a nau piang leh mitthi chhinchhiahtu, registrar of births & deaths (RBD)-te tan training an buatsaih. 

Environment, Forests & Climate Change (EFCC) minister TJ Lalnuntluanga chu a pisaah nimin khan Association for Environmental Preservation (ASEP) hruaitute'n an kawm a, minister a nih vanga lawmpuina thilpek an hlan. TJ Lalnuntluanga chuan, Mizoram leilung, ramngaw leh nungchate venhim kawngah ṭha taka an thawhho a beisei thu a sawi. 

Krishi Vigyan Kendra (KVK), Champhai district chuan January 15, Thawhlehni khan KVK Farmers Training Hall, Khawzawlah an district-a lo neitute tana kum 2018-19 chhunga an hmalakna leh kum 2019-20 chhunga ruahmanna an neihte an thlir let. An hun hmanpuitu Agriculture director Dr Saithantluanga chuan, agriculture chu sumdawnna tlinga siam a ngaih thu a sawi. 

Dawngzawl, Serchhipa awm 159 Bn. Border Security Force sipaite chuan January 15, Thawhlehni khan Keiṭum khuaah civic action programme hawnna hun an hmang a; khawtlang tan infiamna hmanrua an pek bakah, nungcha leh ramngaw humhalhna campaign an buatsaih.