Kalphung tharin lottery kalpui Cheng vbc. 45 velin a hma aiin kan hlawk zawk kan beisei - IFSL

MNF chuan sorkarna an chan hmaa an lo sawisel tawh ṭhin lottery kalpui dan chu thlak an tum a, June 2019 khan distributor tur thlanna tur tender chhuah a ni. Tender chu chhángtu awm mah se, court-ah thubuai a awm avangin hawn theih a ni lo. Lottery chu hun eng emaw chen tihtawp lailâwk a nih hnuah a hma anga kalpui leh a ni.

Vanglaini palai zawhna chhangin IFSL hotute chuan, Mizoram sorkar chu ruahmanna a lo siam tawh anga kal phalsak lailâwk turin Supreme Court-in Gauhati High Court a hriattir thu an sawi a, "Hei vang hian December 3, 2019-ah tender hawn niin, chhángtu zinga chháng sang firm paruk chu lottery kalpui tura thlan an ni a, chu'ng zinga firm pakhat chu court thubuai avangin an awm zel dan tur hriat theih a la ni lo," an ti.

IFSL hotute sawi danin, tun dinhmunah Supreme Court thu angin lottery kalpui lailâwk theih ni mah se, Gauhati High Court-in thutlukna a la siam lo. High Court thutlukna azirin lottery kalpui zel dan tur hriat theih a ni ang.

Lottery firm ṭhenkhat chuan December 12, 2019 aṭangin lottery an kalpui ṭan tawh a, buai­pui ngaite buaipui zawh rih loh vanga la kalpui thei lo firm pawh an awm.

Firm pangate chu February 2020-ah chuan lottery ṭan hman vek tura tih an ni a; firm-te chu kum 5 atan agreement ziahpui niin, agreement chu August 18, 2024-ah a tàwp ang. Agreement ang chuan firm-te'n draw tina an chhûn luh tur zat chu kum tin 5%-in a pung dawn a ni.

Lottery kalpui dan hmasaah chuan, kum khatah sorkarin cheng vbc. 17 vel a hmu ṭhin a, kalphung tharah erawh chuan kum khatah cheng vbc. 62 vel hmuh beisei a ni a; lottery kalpui dan hmasa nena sum hmuh inthlauhna tura chhût chu vbc. 45 vel a tling.

IFSL hotute chuan, paper lottery chauh kalpui a nih tawh dawn thu an sawi a, "Goods & Service Tax avangin online lottery-ah chuan chawi a tam a, miin an bawh tawh vak lo. Online-in kalpui ila, tuna hmuh kan inbeisei ang hi kan hmu phak dawn lo," an ti. GST-in online lottery a  nghawng dan chu GST Council Meeting-ahte pawh sawi chhuah a ni tawh.

A hma chuan Mizoram State Lottery hnuaiah distributor pali an awm a; paper lottery chu Teesta Distributors-in an buaipui a, online lottery pathum chu Summit Online Trade Solutions Pvt. Ltd, NV International leh Ecool Gaming Solution ten an kalpui a ni.

Tunah chuan Mizoram State Lottery hi tender hmanga firm thlan chhuah paruk zinga panga - Summit Online Trade Solutions Pvt. Ltd, BS Enterprise, Skill Lotto Solutions Pvt. Ltd., Pooja Fortune Pvt. Ltd. leh Teesta Dis­tri­butor ten an kalpui dawn a; court thutluk dan azirin  firm dang pakhatin an kalpui leh thei ang.

•    Lottery chungchangah High Court-ah thubuai a awm mek.

•    June 2019-ah tender chhuah a ni a, December 3, 2019-ah hawn a ni.

•    Tender chhángtu aṭangin firm paruk thlan a ni.

•    Firm pangain December 12, 2019 aṭangin lottery an kalpui ṭan.

•    Firm-te chu kum 5 atan agreement ziahpui an ni (August 18, 2024 thleng).

•    Draw tina sorkara chhûn luh tur zat kum tin 5%-in a pung dawn.

•    Kal dan hmasaah kum khatah sorkarin cheng vbc. 17 vel a hmu ṭhin.

•    Kal dan tharah kum khatah cheng vbc. 62 vel hmuh beisei a ni.

•    Kal dan tharah a hma aiin cheng vbc. 45 velin a hlâwk zawk beisei.

•    Paper lottery chiah kalpui a ni a, online lottery kalpui a ni lo.

•    Mizoram State Lottery kalpui mektute

        Ø Summit Online Trade Solutions Pvt. Ltd.

        Ø BS Enterprise

        Ø Skill Lotto Solutions Pvt. Ltd.

        Ø Pooja Fortune Pvt. Ltd.

        Ø Teesta Distributors