Aizawla kawng chhawng siam dan tur CM-in sorkar laipuiah thlen

New Delhi-a châm mek Zoramthanga hian Aizawl khawpuia traffic jam tiziaawm tura rawtna a neihte, kawng chhawng siam dan turte leh parking siam belh dan turte a thlen a, Hardeep Singh Puri chuan Zoramthanga rawtnate chu ṭha a tih thu leh a zir chiang hmasa tur team tirh a tum thuin a lo chhâng a ni.

Chief Minsiter hian Aizawla parking tam zawk siam belhna tura mimal ina parking siam a, a siamna tur sum faia ṭanpuina pek chungchanga rawtna a thlen bawk a, Housing and Urban Affairs minister chuan, "Hei hi rawtna ṭha tak a ni a, sum sen tam si loin parking ṭha tak a siam belh theih a beiseiawm a, India hmar chhak state dangte pawhin entawn ve se a ṭha dawn hle a ni," a ti.

Urban Affairs Minister chuan Chief Minister hnenah hian Mizoramah football khelmual paruk siam a nih tur thu a lo hrilh a, "He thu hi in puangzar nghal thei ang," tiin Mizoram Chief Minister hi a hrilh a, Mizoramin khelmual ṭha a neih belh dawn avangin footballer ṭha neih belh zel se a duh thu a sawi tel bawk a ni.

Chief Minsiter hian Nilaini khan Deve­lopment of North Eastern Region (DoNER) minister Dr Jitendra Singh a kawm bawk a, Mizoram hmasawnna tur kawng hrang hrang a sawipui a; DoNER minister chuan Mizoramah DoNER leh NEC hnuaia project hrang hrangah sum hman a muan thu leh beisei anga hna a kal chak loh ṭhin thu a lo hrilh a, Zoramthanga chuan a kaihhruai sorkar hnuaiah chak zawka hnathawh a nih tur thu leh project hrang hrangte rang taka thawh ṭhin a nih tawh tur thu a sawi.

Chief minister hian vawiin lamah Road Transport and Highways minister Nitin Gadkari leh Railways minister Piyush Goyal-te a hmu leh dawn a; Meghalaya chief minister Conrad Sangma nen Mizoram House-ah an inkawm bawk ang.

Chief Minister hi Sports & Youth Affairs minister Robert Romawia leh sorkar official pawimawhten an ṭawiawm a ni.