Zu dawr neitute Court-ah

The Mizoram Liquor (Prohibition and Control) Act, 2014 hnuaiah Mizoram sorkarin ni eng emaw zat chhung zu hralh, lei, kawl leh in phal lohna ni, dry day a puan avangin zu dahkhawlna (bonded warehouse) neitu mi pathumte leh zu zuartu (vendor)-te intêl khawm chu Gauhati High Court, Aizawl Bench-ah an zualko.

Mizoram sorkar chuan MLPC Act hnuaiah hian nikum December 22 aṭanga kumin January 14 thleng dry day a lo puang tawh a, chumi hnuah January 15 aṭanga March 15 thleng dry day a puan chhunzawm leh a ni. Zu neitu - bonded warehouse neitute leh vendor-te'n High Court-a an khin ber chu - sorkarin January 15 aṭanga March 15 thleng dry day a puan chhunzawm leh chu a ni a; nimin khan an ukilte'n High Court-ah petition an thehlut a ni. 

Zu zuartute thu thehluh hi High Court chuan January 22, 2019-a ngaihtuah turin a dah a, ngaihtuah a nih hunah hian December 18, 2018 leh January 10, 2019-a Council of Ministers meeting minute-te Court-a pharh turin sorkar ukilte a hriattir nghal. MNF kaih­hruai sorkara Council of Minis­ter meeting vawi hnih awm tawhah dry day puang turin thutlukna an siam ve ve a ni. 

MLPC Act hnuaia bonded warehouse neitu te leh retail vendor-te chuan, sorkarin hun rei tak chhung a záwna dry day a puan avangin an license leh permit hmanga an zute hralh chhuak thei loa khuahkhirh a nih avangin sum tam tak an hloh phahah an ngai a; thil dik loa an ngaih avangin High Court-ah hian an zualko ta nia thu dawn a ni.