MNYF-te'n Blood donation camp huaihawt

MNF ṭhalai (MNYF)-te chuan Health minister Dr Lalthangliana ngenna angin nimin khan Mizo Hnam Runah blood donation camp an huaihawt a, Health Minister bakah, Assembly deputy speaker Lalrinawma, MNYF president ni bawkte'n an hmanpui.

Health Minister chuan, MNYF-te'n thisen an pe chu lawmawm a tih thu sawiin, "Sorkarin thisen processing fee a titawp hi damlo harsa mangangte tan a ṭha hlein ka hria. Vawiina kan ṭhalaite'n kan taksa aṭanga chhuak ngei thisen kan han pe hi MNF tan pawh thil pawimawh tak a ni," a ti.

Dr R Lalthangliana chuan, blood donation lam buaipuitu pawl AVBD hruaitute nen an inkawm tawh thu sawiin, "Anni hian ṭhahnemngai takin beihpui an thlak a, an ṭangkai em em a, theihtawp chhuah zel an tum bawk a, Mizoram hmun dang dangahte pawh hma an lak zui zel ka beisei.," a ti a; damlo mangangte hmangaihna nena thisen pek uar zel turin ṭhalaite a sáwm a ni.

Health Care Scheme chungchang sawiin Dr R Lalthangliana chuan, "Sorkarin health care scheme kan kalpui tura hi a hautak dawn hle a, mahse, theihtawp chhuah kan tum. A buaipuitu lamte pawh kan ko tawh a, ruahmanna kan la siam zel dawn, private hospital-te pawh health care scheme kalpui dan tur ngaihtuahin kan inkâwm tawh thu a sawi.

MNYF president Lalrinawma chuan, thisen petu MNYF mi leh sate chungah lawmthu a sawi a, "Thisen pek hi mi dangte tana malsawmna kan nih theihna remchang a nih angin, Mizo ṭhalaite'n chhunzawm zel turin kan insáwm a ni," a ti.

Aizawl Civil Hospital tan thisen unit 73 an pe a, a pete mipa 67 leh hmei­chhia paruk an ni. A ṭul apianga hman turin minister R Lalzirliana chuan Rs. 10,000 a pe a, Mizoram Apex Bank-in refreshment an tumsak bawk.