MPCC-in EVM leh inthlan danah sawisel an nei lo

Congress party (MPCC) Executive Committee chu nimin khan Congress Bhavan-ah an ṭhu­khawm a, kum 2018-a Mizoram Assembly inthlanpui an thlir let. Kum 2018 inthlanpuia Mizoram mipuite kutthlakna chu lawm takin Pathian remruata an pawm thu leh inthlanna hmanrua leh duty-teah sawisel an neih loh thu an tarlang.

MPCC resolution chuan, Mizoram inthlanpuia Congress official candidate-te vote-tu zawng zawngte hnenah lawmthu a tarlan rualin, Congress MLA-te chu ram tana an thawhna turah duhsakna leh lawmpuina an hlan a, "Inthlanna hmarua, EVM leh a thawktute chungchang sawisel kan nei lo chauh ni loin, inthlanna thianghlim leh felfai kan neih theih nana thawktute chungah lawmthu kan sawi a ni," an ti.

Congress party chuan, sorkar thar lo piang chu an lawmpui a, ram leh hnam tana thil ṭha an tihnaah theihtawpa puih leh thlâwp an tum thu an tarlang a, "Ram leh hnam tan leh sakhaw tan pawi an khawih chuan huaisen takin a tàwp thlengin kan dodal ang," an ti a; Congress sorkarin hmasawnna hna chi hrang hrang atana work order a tihchhuah tawh leh NLUP a pek tawhte zingah harsatna tâwk an awm chuan hmalakpui an tum tih sawiin, harsatna neite chu Congress Bhavan-ah inhriattir turin an chah.

Tun hnaia All India Congress Committee (AICC) Core Commi­ttee, Delhi-a an ṭhutkhawma MPCC president Lal Thanhawla’n report a pek chu a hlawhtlin nan theihtawpa hmalak an tum thu sawiin, Lal Thanhawla chu an la rin tawk thu leh a hoa hmalak zui zel an duh thu an tarlang a, "Lok Sabha inthlan leh Assembly bye-election (Aizawl West-I) awm turah theihtawpa ṭan lak ni se," an ti.

Congress party chuan, sorkar laipuia BJP sorkarin Citizenship (Amendment) Bill, 2016 an siam chu a tìr aṭangin an do tawh tih sawiin, "Kan ram leh hnam leh kan sakhaw tana him lo Bill hi theihtawpin kan do zel dawn a ni," an ti bawk.