Inpumpekna nen hna thawk turin fuih

Power & Electricty department chuan nimin khan an hnathawh tawhte thirletna hun leh an hma­chhawpte sawihona hun Administrative Training Institute (ATI) Auditorium-ah an buatsaih a; an hun hmanpuitu P&E minister R Lalzirliana chuan, ṭhahnemngaihna leh inpumpekna nena hna thawk turin a fuih.

R Lalzirliana chuan, P&E department-a thawkte'n an thiam leh finna, an theihnate mipui tan an hmang tak zeta a hriat thu a sawi a; mi tinte chu mipui tana hna thawk tak tak an nih leh ni loh te, an hna an thawk ṭha em tihte inenfiah fo turin a chah.

Transformer chhiat vanga har­satna awm ṭhin sutkian nan budget tharah transformer a chhiat thulha hman mai theih tur eng emaw zat ngaihtuah dan zawn ni se a duh thu sawiin R Lalzirliana chuan, "Power khaihlak laia hmun dang aṭanga lei mai theih tur, sum deposit tur awm loh vanga lei theih loh ṭhin sutkian nan revolving fund neih dan ngaihtuah a ṭul," a ti.

P&E Minister chuan, kawl­phetha hralh chungchang sawiin, "Mipuiin kan mamawh loh lai, zan rei hnuah te power chuangliam hralh ṭhin a ni," a ti a; power hralhna aṭangin sorkar tan sum tam tak lak luh a nih thu a sawi.

P&E engineer-in-chief Lal­ramliana tarlan danin, tun dinhmunah Mizoramah small hydro power (SHP) generating station 11 a awm a, chu'ngte installed capacity chu megawatt 29.35 a ni. Project thar zawh hnaih tawh pahnih - Tlawva SHP (5 MW) leh Kawlbem SHP (4 MW) a awm a; thawh zawh tawh leh commission mai tur - Tuiching SHP kilowatt 100 leh Tuiriza kilowatt 100-te a awm. Solar Power Project hmalak mek - Vankal Solar park (megawatt 20) leh Tlungvel Solar Park (megaqatt 2) awm bawk.