Sorkar hmasa kih hnawk sawi sawi loin Hna kan thawk mawp mawp - Ruatkima

Minister Lalruatkima chuan, MNF kaihhruai Mizoram sorkar thar chuan sorkar hmasain kih hnawk tam tak an nei chungin, kih hnawk chungchang sawi sawi loin hna an thawk mawp mawp mai niin a sawi.

Lalruatkima hian nimina Phulpui MNF unit-in an MLA thar leh sorkar thar lawmna inkhawm an khaw community hall-a an buatsaihah thu sawiin, "Sorkar hmasaah khan kih hnawk tam tak chinfel ngai a awm a, mahse, kih hnawk sawi sawi hman kan ni lo. Mipuit tan kan thawk nghal mawp mawp mai a ni. Sorkar hmasa thil tihte a ṭha kan chhunzawm zel ang a, sorkar tharah kalphung thar ṭha tak tak kan hmu zel dawn a ni," a ti.

Sorkar hmasain zu an zawrh avangin zu bâwihah mi tam tak an táng nia sawiin Lalruatkima chuan, "Mi tam tak an thi a, hmeithai leh fahrah tam tak an awm phah. Kohhran leh khawtlang an mangang em em. Zu zawrh tihtawp avang hian sum tam tak sorkarin chán dawn mah se, nunna a hlu zawk tih hi kan Chief Minister ngaihdan a ni," a ti a; Mizoram a dam phah a, mipui tan a ṭhat dawn phawt chuan demna leh sawiselna karah pawh an kal zel tur thu a sawi.

Bialtu MLA Prof. F Lalnunmawia pawhin thu sawiin, mipuite'n sorkar ṭha an zeih theih nan an ṭawngṭai a, sorkar ṭha a ding mek nia a hriat thu sawiin, "MLA leh minister fel tak tak kan nei hi mipui kan lawmin ka hria. Sorkar tharah hian mipuite'n beiseina sang tak kan nei a, kan beisei ang ngeiin chief minister chak tak Zoramthanga hoin chak takin hma an la nghal char char a, a lawmawmin a thlamuanthlak tak zet a ni," a ti.