Sorkarin sum ngaihtuah chungin zirna atan Ngaihtuahna a hmang mek - Edcuation Minister

Chawlhhmun High School chuan nimin khan an din champha vawi 25-na, silver jubilee an lawm a; khuallian School Education minister Lalchhandama Ralte chuan, "Ram sum leh pai dinhhmun ngaihtuah chungin sorkarin zirna atan ngaihtuahna a hmang mek a ni," a ti.

Lalchhandama Ralte chuan, Mizoramah missionary-te'n zirna an kalpui ṭhin thu sawiin, "Hun a lo kal zel a, a rah chhuah ram leh hnam tana chhawr tham mi puitling hmuh tur an tam a, education-in a tum - lehkhathiamte nihphung an keng chho ṭha hle. Sorkar hnuaia zirna a luh hnuah education hi kan nun honaah kan ngaih pawimawh thar a ni," a ti a; zirna chu mission rilru nena kan kalpui thar leh a ṭul thu a sawi.

School Education department chu department dang ang a nih loh thu sawiin Minister chuan, "Zirnaah hian kan tih fuh loh chuan kan ram tlûkchhiatna tur a ni ang. Kan ramin a mamawh chu lehkhathiam ringawt ni lo, Pathian hre mi lehkhathiam a mamawh a ni," a ti.

School Education Minister sawi danin, Mizoramah zirtirtu post ruak a tam hle a, primary school-ah 1,150, middle school-ah 700 chuang awmin, high school leh higher secondary school-ahte pawh post ruak thahnem tak a awm. Mizoram sorkar chuan adhoc aided school-a thawkte tan January 2019 aṭangin 7th. Pay an hman dan tur a ngaihtuah a ni.