MLA motor leisakna sum tihpun duh lo

PRISM party chuan thuchhuah siamin, Mizoram sorkar tharin MLA-te motor leisakna tur tipung chu an duh loh thu an tarlang a, "MLA-te tana mipui sum cheng nuai 80 sên belh tur hi kan duh lo," an ti.

PRISM chuan, Mizoram MLA-te chuan thla khatah Rs. 40,000 an hlawh a, an hlawh pangngai bakah constituency allowance Rs. 10,000, contingency allowance Rs. 5,000 leh family allowance Rs. 5,000-te lain, thla khatah Rs. 60,000 an la tih an tarlang.

PRISM tarlan danin, MLA-te'n sum an lakte bakah, personal assistant pakhat, personal attendant pahnih leh driver pakhat pek an ni a; chenna pek niin, mahni ina an chen pawhin an in cheina tur term khat (kum nga) chhungin Rs. 3,00,000 pek an ni. Damloha enkawlna, zinna, telephone, tui leh kawlphetha hman mante sorkarin a tumsak a, a pung tlém chiin housing loan Rs. 10,00,000 leh vehicle loan Rs. 4,00,000 an la thei bawk.

A chunga tarlante bakah MLA-te chu term khat chhungin mipui sum aṭangin motor leisak an ni tih sawiin PRISM chuan, "Motor lei nan a hmaa mi pakhat tan Rs. 8,00,000 hman ṭhin a ni a, tunah General Purpose Committee-in motor leina tur mi pakhat tan Rs. 10,00,000-ah tipungin, MLA pakhat zelah Rs. 2,00,000 zel sên belh ngai dawn a, a vaiin Rs. 80,00,000 hman belh a ngai dawn a ni," an ti.

PRISM chuan, MLA-te tana motor leina sum pek ṭhin tihpun chu an duh lo tih sawiin, "Nawm­chenna lama sum sen belh hi hmasawnna tiṭhuanawptuah kan ngai," an ti a; MLA tana motor leina tihpun chu dodal turin mi tin an sáwm a ni.