Phaisen-ah checkgate dah turin hmalak tum

Serlui bialtu MLA Lalrinsanga Ralte chuan, ramri venhimna atan leh ṭhenawm state aṭanga thil rûkbo tlanbopui a nih lohna atan Phaisen khuaah police checkgate dah a nih theihna atan hma a lak dawn thu a sawi.

Lalrinsanga hian nimin khan a bial chhung Phaisena IR awmna hmun a tlawh a, checkgate awm theih dan tur a en nghal. Lalrinsanga chuan, "Serlui bial hi Mizoram leh Assam ram inrinni, ramri depa awm a nih avangin a pawimawh a, Mizoram hmél lanna pakhat a ni. Kan bial hmasawnna hna­thawh kawngah mipuite nen ṭangrualin theih­tawp chhuah a ṭul," a ti.

Hnam dangte'n Mizorama motor-te rûin, Phaisen kawng chu tawlhrûkna atan an hmang ṭhin nia sawi a awm thu sawiin Serlui MLA chuan, "He lai hmunah hian checkgate dah a pawimawh hle. A hma thei ang bera dah a nih theihna atan hmalak a ni ang," a ti a; sorkarin ram leh hnam damna a ngaih pawimawh dawn thu a sawi.