KHAWTHLIR

Power & Electricity dept. chuan hriattirna tichhuak­in, tukin zing dar 9 aṭanga tlai dar 4 thleng Luangmual sub station-ah hnathawh a nih dawn avangin, hnathawh hun chhung hian Zonuam, Govt. Complex, AICS, MZU, Luangmual, Chawlhhmun, Zohnuai, Zotlang, Chawnpui Veng ṭhenkhat, Chhangur­kawn, Ropaiabawk, 

Rangvamual, Phun­chawng, Chawlhhmun, Kawnzau, Hunthar, Bawngkawn South, Chatlang Veng ṭhenkhat, Edenthar, Tuivamit, Ramrikawn, Central Jail Veng, Tanhril, Sakawrtuichhun, IGC, High Court-ahte eng a awm dawn loh thu an tarlang.

Home minister Lalchamliana chuan nimin khan a pisaah Mizo Students’ Union (MSU) hruaitute a kâwm a, Mizoram leh hnam himna tur thil chi hrang hrang an sawiho. An thil sawiho zingah, dan loa khaw din, a bikin CADC area, Lunglei district leh Lawngtlai district chhunga mite  tihbo a ṭul thu te, foreigner-te an rama thawn kîr vat a ṭul thu te, Chawngte-ah IR batta­lion chungchang te, ILP chungchangte a tel. 

AH&Vety minister Dr K Beichhua chuan nimin khan Siahaa AH&Vety Farm a tlawh a, bawng vulhna tihchangtun dan tur a enfiah. Minister chuan, farm-a thawktute'n mawhphurhna pawimawh tak an neih vek thu sawiin, "Kan mawhphurhna ṭha taka tih hi Pathian ringtu leh khua leh tui ṭha tih tur a ni. DVO aṭanga a tê ber thlengin thawhhona ṭha neih a pawimawh a, in pawimawhna a inang vek a ni," a ti.

Excise & Narcotics department chuan, December 2018 chhung­ khan zu zuar 62, zu rûi 19, rakzu litre 2589.925, zu bilh lai ṭín 3,607, sapzu ûm puitling 195 leh 

an man a; zu kaih­hnawihah lirthei panga an man bawk.

Nimin khan Mamit DC conference hall-ah electoral roll observer Lalthangpuia Sailo hoin official, political party leh tlawmngai pawl aiawhte'n electoral roll revision neih mek chungchang an sawiho. Meeting-ah hian electoral roll-a chuangte thenfai (roll purification) chu Election Commission of India duh dan anga kalpui mek a nih thu leh, kum tling tharte roll-a an chuan ngei theihna atan continous updation tih a nih thu tarlan a ni.