Mizoram State Health Care Scheme thar October 1 aṭangin hman ṭan a ni dawn

Health department hotute hnen aṭanga Vanglaini thu dawn danin, MSHCS hian a huam chin turte chu sorkar laipuiin health care policy a duan, Ayushman Bharat - Pradhan Mantri Jan Arogya Yojana (AB-PMJAY) hmang ve thei lote a huam a, Mizoram chhung bakah, phai lama inenkawlnate pawh a huam tel. Inenkawlna bill theih tur chu Mizoram sorkar bithliah notified rate ang a ni.

MSHCS hnuaia inziah luhna atan kumin September - November chhung hun hawn a ni dawn a, local council/village council-te'n inziah luhna hmun tur an ruahman ang a, ṭum khat inziah luhin kum khat chhung zel a huam ang.

Mizoram chhunga sorkar damdawi-in zawng zawngte chu MSHCS-in a huam nghal dawn a, private damdawi-in zawng zawngah pawh hman a nih theihna atan Health department-in hma an la mek. Damdawi-in awm hma ni 10 leh chhuah hnu ni 10 thlenga inenkawlna bill theih a ni dawn a, organ transplant-te tan chuan ni 30 thleng bill theih a ni ang. Doctor certify-in admit hma investigation tihna atana senso a huam tel bawk.

MSHCS hnuaia golden card nei tawhte chuan October 1 aṭangin an card an hmang thei tawh dawn lo a, an in register ṭhat leh a ngai dawn a ni. Hetih lai hian, AB-PMJAY chu a ngai anga kalpui reng a ni a, chhungkaw pakhatin kum khatah Rs. 5,00,000 thleng an bill thei. AB-PMJAY-in a huam­te chu, Ministry of Rural Development hnuaia Socio Economic Caste Census (SECC), 2011 deprived list (chhungkaw harsa leh hnuaihnung)-a telte leh kum 2018-a RSBY hnuaia smart card neite an ni.

AM-PMJAY hnuaia inziak lutte tan chuan pawisa pe nghal lo (cashless)-in damdawi-inah inenkawl theih a ni a, kal velna leh zin veivahna erawh a huam lo. Scheme hnuaia inziak lutte chu India ram puma sorkar damdawi-in leh sorkarin a pawm mimal damdawi-inah an inenkawl thei ang. AM-PMJAY hnuaia inziak lut duhte tan sorkar damdawi-inah inziah luh theih reng a ni.