ZMC-ah live operative workshop neih a ni

Zoram Medical College (MIMER)-a Department of Surgery chuan phai lama doctor thiam bikte sáwmin September 3-4, 2019 khan Continuing Medical Education (CME) seminar leh live operative workshop an hmang a; hlawhtling takin mi eng emaw zat an zai.

September 3-a seminar buatsaihah ZMC-a doctor te, Aizawl Civil Hospital-a senior surgeon-te leh damdawi-in hrang hranga thawk doctor specialist-te an tel a, ZMC director Prof. L Fimate-in hawngin, pum leh ríl lam (gastroenterology) an zirho a ni.

An mi sâwmte - gastroenterology super specialist Dr Sujit Chaudhury leh laparoscopic surgeon Dr Deb Kumar Roy ten thu an sawi bakah, case chi hrang hrang a takin an entir a; ZMC-a assistant professor Dr Samuel Lalhruaizela, Department of Surgery-in presentation hun hmangin, advanced endoscopy leh endoscopic retrograde cholangio­pancreatography (ERCP) chungchanga an hlawhtlinnate a sawi. Sawi­hona hun hman a ni bawk.

September 4, Nilaini khan operation theatre-ah Live Operative Workshop neiin, rílpui cancer nei damlo pahnih chu pumpui zai hawng loa a verha verh hmangin a cancer lai an lak chhuahsak a; hetianga tih hi Mizoram tan thil thar a ni. Case an khawih zawng zawng zat chu panga a ni.

Live Operative Workshop-a damlo an zaite hian inzaina bungrua leh senso engmah an chawi lo a, a thlawna zai an ni. Phai lama an inzai dan angin zai ni se chuan, cheng nuai 2-4 vel sen ngaihna tur a nih thu an sawi.

ZMC hotute chuan, Mizo zinga mi eng emaw zatin natna an neih, phaia enkawl ngai ṭhinte chu ZMC-ah ERCP hmanga enkawl theih a ni tawh a, cheng tam tak sên ngaihna ṭhin chu Mizoramah ngei khawl a awm tâk avang leh an hman ṭan tawh avangin enkawl ve theih a ni tawh tih an sawi. Mizoramah medical college a awm tâk avangin thil thar tam tak tih mek a ni a, chu'ngte chu Mizoram mipui tan hlâwkna ni se tih chu ZMC surgeon-te duhthusam a nih thu an tarlang bawk.