Union Minister leh CM an inkawm

Zan khat riaka Mizoram rawn tlawhtu, Union minister of state for Food Processing Industries Rameswar Teli leh chief minister Zoramthanga chu CM bangla-ah September 4, Nilaini tlai khan an inkâwm a; Mizorama ei leh in tur sawngbawlna lam, food processing industry changtlung zawk siam dan tur an sawi dûn.

Union Minister hian Nilaini tlai khan BJP, Mizoram Pradesh pisa a tlawh a; Mizorama a zin vawi khatna a nih thu sawiin, Lengpui Airport aṭanga Aizawl panna kawng chu a chhiat avangin DoNER-ah kawng siam ṭhatna tur ruahman a nih theih nan theihtawp chhuah a tum thu a sawi a, "Mizoram hi hmarchhak state dang ka tlawh tawh zingah kawng nei chhe ber in nih avangin hmalak a ngai a ni," a ti.

Rameshwar Teli chuan, Food Processing Industries ministry hnuaia budget cheng vbc. 1,400 an neihah hmarchhak bial tan vbc. 140 pek a nih tur thu sawiin, "Sum hi a bo a bâng awm loin hna thawh nan hman vek a ni dawn," a ti a; sorkar laipuiin India hmarchhak hmasawnna turin theihtawp chhuah a tum thu leh, department hrang hrang aṭangin hmarchhak bial tan 10% tal an hman theih nan Union Finance Minister a titipui thu a sawi bawk.