ACH-ah thisen pek tam ber thla

Mizorama model blood bank awmchhun, Aizawl Civil Hospital (ACH) Blood Bank-ah August 2019 chhung khan thisen unit 1,845 pek a ni a; hei hi ACH-ah blood bank din a nih tirh aṭanga thla khat chhunga thisen pek a ṭhathnem ber thla a nih thu, ACH Blood Bank-a HoD Dr Rothangpuia chuan a sawi.

Aizawl Civil Hospital Blood Bank-a August 2019 chhunga thisen pek zat unit 1,845 zinga unit 1,739 chu a thlawna pek bik nei loa pek (voluntary donation) a ni a, 94% a tling; chutih laiin, unit 106 chu pek bik nei (replacement) a ni thung. August thla khan ACH Blood Bank hian donation camp vawi 20 an nei a ni.