October 4-ah GoAir thlâwk ṭan dawn

Mizoram sorkar thuchhuah chuan, October 4, 2019 aṭangin Aizawl (Lengpui) leh Guwahati inkarah GoAir-in thlawhtheihna an thlawhtir ṭan dawn a, ni tin an thlâwk dawn tih a tarlang.

Sorkar thuchhuah tarlan danin, GoAir (India) deputy general manager Sumit Bhandari chu September 4, Nilaini khan Aizawlah a rawn zin a, GAD Aviation hotute nen an indawr a; Aizawl-Guwa­hati leh Guwahati-Aizawl inkara an thlawh ṭan theihna tura thil mamawhte a sawipui a ni.

Sumit Bhandari chuan, Aizawl leh Guwahati inkarah October 4, 2019 aṭanga an thlawh ṭan theih an beisei thu leh chuta tana ṭul leh mamawhte a hmuna en tura Aizawla lo zin a nih thu a sawi. GoAir ruahman dan chuan, Aizawl leh Guwahati inkarah Airbus 320, mi 180 chuan theihna thlawhtir an tum a, ni tin thlâwk tura ruahman a ni. Zing dar 6:50-ah Guwahati aṭanga chhuakin, zing dar 7:50-ah Lengpui a thleng ang a; Lengpui Airport aṭangin zing dar 8:40-ah thlawk chhuakin, zing dar 9:50-ah Guwahati thleng tura beisei a ni.