KHAWTHLIR

Springfield Academy, Kolasib-a zirtirtute chuan nimin khan Tea­chers Day pualin Kolasib District Hospital-ah thisen unit sarih an pe a, a petute mipa panga leh hmeichhia pahnih an ni. Mizoram Chakma Students' Union, Aizawl-in Aizawl Civil Hospital tan thisen unit 14, mipa 13 leh hmeichhia pakhatte'n an pe a; UPC (NEI) Driver Welfare pawhin State Referral Hospital-ah thisen unit sarih an pe bawk.

Assam Rifles-te chuan September 4, Nilaini khan Lawngtlai district-a Parva-II khuaah puanṭhui khawl 10 an sem. Puanṭhui khawl sem hi AR Civic Action Project 2019-20 aṭanga an tih a ni a, Civil Action hnuai­ah hian AR sipaite'n an awmna chhehvel khuaah mipui vantlang rawngbawl hna an thawh ṭhin thu an tarlang.

SRS leh Excise & Narcotics department-a Anti Narcotic Squad-te chuan nimin chawhma dar 10 khan ITI Veng, Aizawlah heroin gram 14 an man a, a neitua puh Lianthangpuii (44) d/o Zakunga (L), Champhai Kahrawt Veng nia insawi an man tel bawk.

Mizoram Departmental Officers' Association (MDOA) hruaitute chuan nimin khan chief minister Zoramthanga chu a pisaah an hmu a; MDOA dinhmun leh harsatnate an sawipui. MDOA-in tun hnaia ngenna an thlente sorkarin a tih­hlawhtlinsak avanga an lawm thu an sawi bawk.

Sangau khua leh a chhehvel aṭanga Sa­ngau damdawi-in (PHC) pantute zinga harsa leh chhawmdawl ngai bikte ṭanpuina atan Sangau Joint V/C, SJAC leh YLA sub-headquarters hruaitute hmalaknain damdawi-inah Poor Fund Box dah thar a ni a, nimin khan medical officer Dr Noel Lalremruata Sailo office-ah hawn a ni.

Nimina chhuak Vang­laini-a Laithangpuii College of Pharmacy-a Diploma in Pharmacy examination result chhuak chungchang tarlanah tisual palh a awm a, result tichhuaktu chu Mizoram University ni loin, Mizoram State Council for Technical Education a ni a; Diploma in Pharmacy Part-I exam-a pakhatna chu Annie Vanlalruati d/o TC Lalnunsanga tih tur a ni.