Mizoram pumah Teachers' Day hman a ni

Nimin kha Teachers' Day a nih angin Mizoram hmun hrang hrangah zirlaite leh zirtirtute'n an hmang a; hmun ṭhenkhatah chuan minister-te'n an hmanpui.

Higher & Technical Education minister Dr R Lalthangliana chuan Lunglei DIET Trainees’ Union-in DIET Multipurpose Hall-a Teachers’ Day an lawmna a hmanpui. Minister chuan, DIET mamawh hmasawnna ruhrel changtlung zawk ruahman tura theihtawp chhuahpui a tum thu a sawi.

Dr R Lalthangliana chuan, Mizo­rama zirna siamṭha tur chuan zirtirtute training-na hmunpui DIET-ah bul ṭan a ṭul thu sawiin, zirtirtute chu ṭha­hnemngai taka thawk tur leh ram leh hnam hmasawnna tura hma la ṭhin turin a chah a, "Zirtirtu hi hna zahawm a ni a, zirtirtute'n zirlai naupangte hmangaih leh dawhthei taka an enkawl ṭhin a ngai a ni," a ti.

School Education minister Lal­chhandama Ralte chuan Ṭhuamluaia Mual, Lungleia MZP Hqrs, Lunglei leh Mizoram Independent School Association, Lunglei buatsaih Teachers' Day lawmna a hmanpui a, Mizoram sorkarin Zirtirtute Ni a ngaih pawimawh avangin, nakkum aṭang chuan ropui leh awmze nei zawka lawm dan ngaihtuah tum a nih thu a sawi.

Lalchhandama Ralte chuan, zirtirtute chuan Mizo ram leh hnam kal zelna turah mistiri an ni tih inhre thar se a duh thu sawiin, "Kan hnam kal zel dan tur chhertu an nih avangin an mawhphurhna an hriat chian a ngai a, mipui pawhin Zirtirtute Ni hi kan hlut tur a ni," a ti. Zirlaiteah zirlaibu aṭanga thiamna ringawt pe loin, an hma lam hun kal zel tura pawimawh turte zirtir a pawimawh thu sawiin, zirtirtu hna chu ei leh bar hmuhna ringawt a ni lo a, mihringte nun puitling nei tura chhertu an ni tih inhre turin zirtirtute a chah a ni.

Ṭhuamluaia Muala Zirtirtute Ni lawmnaah hian Lunglei HPC vice chairman Lawmawma Tochhong leh Mizoram Youth Commission chairman Dr Vanlalṭanpuia te pawh an tel. Minister Lalruatkima pawhin MZP Gen.Hqrs-in Central YMA Hall-a Teachers' Day an lawmna a hmanpui. Minister chuan, hmasawnna kawnga khawvel intlansiak meka tel turin thiamna a ngai tih sawiin, "Thiamna min petu chu zirtirtute an ni a, zirtirtute zah leh chawimawi hi kan tih tur dik tak a ni a, ram leh hnam dintu tia an sawi ṭhin hi thil âwm tak a ni," a ti a; zirtirtute hlutna hriat leh zah thiam chu mi tin bat a nih thu a sawi.

Lalruatkima chuan, Mizoramin kum tin zirtirtu ṭha chawimawi tur a nei thei chu chhuanawm a tih thu sawiin, "Zirtitute'n an pawimawhna te, an hnain mawhphurhna a ken telte an hriat chian hle a ngai a, zahawm taka nun leh mahni invawn uluk kawngah entawn tlakin an nung tur a ni," a ti.

MZP-in Teachers' Day an hmannaah hian zirtirtu chawimawina - National Award to Teachers' dawngtu mi pahnih leh State Teachers' Award dawngtu mi panga hnenah chawimawina an hlan a ni. Assembly deputy speaker Lalrin­awma pawhin Awithangpa Hall, Kawnpuia MZP sub-hqrs. Kawnpui-in Teachers' Day an lawmna a hmanpui a, Kawnpui khaw chhunga sikul hrang hranga zirtirtute an tel. Lalrinawma chuan, "Zirtirtu zahawmna humhim hi mi dang tih tur a ni lo a, zirtirtute ngeiin an tih tur a ni. He hna zahawm leh pawimawh tak hian mawhphurna tam tak a keng tel a, chu mawhphurna chu rinawmna nen hlen chhuah a ngai," a ti.

MJA Gen.Hqrs. president Zonun­sanga Khiangte pawhin Dawrpui Multipurpose Centre-ah St. Anthony's Higher Secondary School-in Zirtirtute Ni an lawmna a hmanpui a; thu sawiin, zirtirtute chawimawi a ṭul chhan chu, mi puitlinga mite siamtu, hna danglam bik a nih vang a nih thu a sawi.

Zonunsanga Khiangte chuan, zirtirtu zingah zah tlak vak lohte pawh an awm thei tih sawiin, "Zirtirtu hna pawimawhna a lang a, nun vawn uluk thlengin a ngai a, zirtir danah taimak chhuah a ngaihzia a lang," a ti a; naupangte puitling tur leh thiam tura duh tak taktu zirtirtu chu a hnathawh danah a lang ṭhin tih a sawi bawk.

St. Anthony's HSS-in Teachers' Day an hmannaah hian khualzahawm pahnih - Vanneihtluanga leh Lalnghinglova Hmar ten zirlaite fuihna thu an sawi a ni.