Sports Minister a thusawi loh sawi tirah MNF ṭhalaite'n Congress ṭhalai an puh

Mizo National Youth Front (MNYF) chuan thuchhuah siamin, Sports & Youth Services minister Robert Romawia Royte chu a thu sawi loh sawitirah Congress ṭhalaite an puh.

MNYF chuan, Congress ṭhalaite'n thuchhuah siam a, Sports Minister chu thu dik tâwk lo hmangin an bei niin an sawi a, "Thu dik tâwk lo hmanga inbeih hi pawi kan ti hle. Congress ze dik tak, inthlan pawha an tlakpui hial khawpa ze 

ṭha lo, an tlak hnu thlenga an sim hlei thei lo hi pawi kan tihpui a, insiamṭha tawh se kan duh hle," an ti.

Sports Minister hian September 2, 2019-a Mizo Hnam Rûna a thu sawiah, Khawzawl football ground siamna tur cheng nuai 700 chu Chief Minister leh Dy. Chief Minister-in Mizoram sorkar budget aṭanga an ruahman a nih thu a sawi tih tarlangin MNYF chuan, "Ama hmalakna tih a sawi lo hrim hrim a ni," an ti a; Sports Minister chu amah vanga sum dah a nih thu sawiah Congress ṭhalaite'n an puh niin an sawi a ni.

MNYF tarlan danin, Sports Minister hian Deputy CM a sawipui hnuah DO letter hmangin Khawzawl leh Zemabawk khelmual siamna atan Chief Minister hnenah pawisa dah turin a ngen a ni. Chief Minister chuan UDPA leh Planning Secretary hnenah Sports Minister rawtna tifel turin ziakin a hrilh a, March 29, 2019-ah khelmual pahnih atan cheng nuai 700 ve ve sanction a ni.