Vawk hri léng chungchang sawiho

PIGFED Board of Directors chu nimin khan an meeting room-ah an ṭhukhawm a, an mi leh sate'n harsatna an neih leh neih loh chungchang leh tunlai hri leng laka an dinhmunte an sawiho.

PIGFED chuan, PRRS leh Classical Swine Fever laka kan invenna atan sorkar hmalaknain kum tir aṭangin district tinah ram dang aṭanga dan loa vawk lak luh khapna order kenkawh a nih thu an tarlang a, "Hei vang hian kuminah vawk hri vanga harsatna lian tham vawk vulhtute’n kan la tâwk lo, sorkar lakah kan lawm hle," an ti.

Sorkar hmalakna chu mipui, khawtlang hruaitu te, tlawmngai pawl leh vawk vulhtute'n ṭha taka an thlàwp zel a ṭul thu sawiin PIGFED chuan, "African Swine Fever kan ram ṭhen­awm Myanmar-a léng mek hi Mizorama a lo luh loh nan theihtawp chhuah turin mipui kan ngen a ni," an ti a; ram dang aṭanga vawk la lut hriate chu thuneitute hnenah thlen ṭhin se an duh thu an sawi.