Minister-in lei leh in khi a enfiah

Minister of state Lal­ruat­kima chuan a bial chhung, Vaivakawn, Hunthar Veng leh Chan­mari West inrìna péng­ṭhuama SIPMIU, Aizawlin pipe phûmna atana kawngpui an laih chhiat vanga lei khîkna lai leh a bula chhungkaw ṭhenkhat chenna in khite a enfiah.

Vaivakawn, Hunthar Veng leh Chanmari West inrìna péngṭhuam laia lei khi avangin Vaivakawna in pasarih dinna lai chu hmun eng emaw zatah a khi tel a, Dawrpui Veng­thar lam hmun ṭhen­khat a huam tel bawk. Lei khîkna bul vela in khi neitute chuan Minister hnenah hian an harsatnate an hrilh a; in khi avangin dinhmun hlauhthawnawmah an awm thu te, thinthía an mut ngam loh thute an sawi.

Lei leh in khîk dan enin, a chhan puhmawh theih mai tur chu - SIPMIU-in Vaivakawn-Chanmari West panna kawngpuiah pipe phûmna tur kháwl lian hmanga an laih vang leh, lei laih chu tui luh theih loh tura hnawh phui leh thuai a nih loh vanga an ngaih thu an sawi bawk.

Minister Lalruatkima chuan, Hazard Safety Cell chu in khìte dinhmun a rang lama enfiahsak turin a ti a; SIPMIU-in kawng a laih chhiat, hnawh phui ṭhat tâwk loh lai awmte pawh hnawh ṭha tura a tih bakah, a leilung dinhmun enfiah turin mithiamte ngen ni se, a ti. Lei leh in khi chu Hunthar Veng leimin kumhlun bul hnaia awm a nih avangin fimkhur a ngaih thu sawiin, a rang lama hma la turin a kaihhnawih department hotute a ngen a ni.

Lalruatkima chuan, Vaivakawn pengṭhuama SIPMIU pipe phûmna tura kawng an laih khuar, an hnawh hnua khuar leh vanga kawng chhia a en nghal bawk a; kawng khuar chu a rang lama thawm ṭha turin PWD hotute a ngen nghal.

Minister Lalruatkima hi DMR director FJ Lian­tluanga, Aizawl addi­tional DC John LT Sanga, SIPMIU project director Lalrothanga, PWD leh GMR hotute leh khawtlang hruaitute'n an ṭawiawm.