Gas home delivery service tlangzarh

Food, Civil Supplies & Consumer Affairs minister K Lalrinliana chuan nimin khan Ramhlun North-a MIZOFED showroom-ah eirawngbawlna gas (LPG) home delivery kalpui tur a tlangzarh.

K Lalrinliana chuan, mahni kawtkai ngeia gas bûr inpek a nih theihna tura hmalakna chu hun rei tak ata buaipui tawh a nih thu sawiin, "Gas laknaa mimalin sum leh pai, thâ leh zung leh hun hlu tak kan sen ṭhinte chu home delivery hian a chhâwk hle dawn a ni. Home delivery service hian ṭhalaite tan eizawnna rintlak a siam belh ngei ka beisei," a ti.

LPG home delivery hi College Veng, Aizawlah enchhinna atan kalpui hmasak tur a ni a, gas la duh tan interactive voice response system (IVRS) number 9089024365-ah call tur niin, agency phone number leh anmahni cunsumer number-te chhut luh leh tur a ni. Inziah luh aṭanga ni li hmain gas chu an dawng thei tura ngaih a ni a, consumer number ngai chu ni 21 chhung hman nawn theih a ni dawn lo.

Home delivery enchhinna atan hian delivery charge a awm dawn a, gas bûr pakhatah Rs. 90 a ni ang.