Online-a lehkha pawimawh registration tihna
Directorate of Stamps & Registration-in online-a lehkha pawimawh registration tihna, National Generic Document Registration System (NGDRS) an buatsaih thar chu deputy chief minister Tawnluia'n nimin khan State Guest House-ah a hawng. Mizoram chu India ramah NGDRS hmang parukna leh hmarchhakah pahnihna a ni.
Deputy Chief Minister chuan, sorkar dawrna kawngah harsatna hrang hrang a awm thei tih sawiin, mipui pawhin buaina an tâwk fo tih a sawi a, "NGDRS hmanga mahni in lum aṭanga kan document mamawh tihfel zung zung a theih dawn ta hi a lawmawm hle. 'Hei hian sorkar langtlang leh ṭha siam kawngah nasa takin a puih ka beisei," a ti.
Khualzahawm Lalruatkima, Land Revenue & Settlement minister chuan, "In hmun leh ramri chungchang buaina hrang hrang kan tawh ṭhinte NGDRS hian a chinfel ngei ka ring a, document registration bakah, land record felfai tak kan neih theih phah ngei ka beisei," a ti a; SEDP hnuaia hmalakna tur hrang hrangah NGDRS chu hmanraw ṭangkai tak a nih tur thu a sawi.
Khualzahawm dang Ruol-khumlien Buhril, sorkar laipuia secretary chuan, "India ram puma registration software pakhat hman a nih chuan kawng tam takah sorkar a pui nasa dawn hle a ni. India-a state 23 chuan 90% land record an computerise tawh a, state 22 chuan 90% computerised registration an ti tawh," a ti.
NGDRS hi Aizawl district-ah kalpui ṭan a ni dawn a; ram lei, inpek, bank-a dahkham, document registration, leh thil dang ti tur tan LRS department-a settlement officer / asst. settlement officer (sub-district registrar) hnenah kal hmasa loin, mahni in aṭangin online-in document thehluh theih a ni tawh dawn.
Online hmanga ti dun tan website http://igrmizoram.nic.in ah lutin, citizen login aṭangin document register turte dah luh (upload) tur a ni. Upload hunah settlement officer/sub-district registrar hnena inlan hun turte mahni duh ang thlan theih a ni ang. Settlement officer hnena inlan hunah ram neitu thar leh hralhtu te, LSC mortgage-tu te, document dang registration titute an inlan ngei a ngai a, fingerprint leh thla lak a ngai a ni. Software buaipuitu National Infomatic Centre, Pune leh Aizawl hotute'n online-a registration tih dan an sawifiah.