Oct 1-ah Bru lak lêt

Ministry of Home Affairs (MHA)-in a din Joint Monitoring Group (JMG) member-te nimina New Delhi-a MHA pisaa ṭhukhawm chuan, Tripura-a raltlân Mizoram Bru-te chu kumin October 1 aṭanga lak let ṭan turin a rél. Bru-te hi a hma chuan tun September thla chhunga lak lêt tum a ni.

Meeting-a tel Central YMA president Vanlalruata chuan, Mizo mipuite'n Bru hruai kîr tumah kum tam tak an ngaihchân tawh thu leh an dawhtheihnain a tlin loh a hlauhthawn thu a sawi a; sorkar leh NGO-te inbiakrem tawh angin, tun ṭuma lak lêt tum chu a tàwpna ni tawh se, kîr duh lote chu Mizoram electoral roll aṭanga paih ni se an duh thu a sawi bawk.

MHA official-te pawhin, tun ṭum bak chu Bru hruai kîr hna hi thawh an tum loh thu an sawi nawn a; Mizoram Bru Displaced people Forum hotute chu Mizorama kîr hmasa ni turin an ngen. October 1, 2019 aṭangin Tripura camp-a ṭanpuina pek ṭhin zawng zawng tihtawp a nih tur thu MBDPF hotute an hrilh.

Meeting hi MHA special secretary Dr AP Maheswari chuan a kaihruai a; MHA official-te bakah, Mizoram aṭangin Home secretary Lalbiakzama, OSD David H Lalthangliana leh CYMA president Vanlalruata, Tripura sorkara principal secretary, MBDPF general secretary Bruno Msha, MBCC chairman Elvis Chorky leh Tripura camp aiawhte an tel.