MNF sorkar hi tihpalh thila sorkar an ni - Lal Thanhawla
Mizoram Pradesh Congress Committee (MPCC) president Lal Thanhawla chuan, MNF sorkar chu tihpalh thila sorkar an nih thu a sawi a, "Mi tam takte dil loh zawk Pathianin min pe a ni ber," a ti.
Nimina Congress Bhavan-a political session-ah thu sawiin Lal Thanhawla chuan, "Ram rorelna hi hmui ringawt hmanga kalpui chi a ni lo a, a taka hna thawh a ngai. A hun leh hmun pawh ngaihtuah lêm loa duh duh sawi ringawt tan awmze neiin ram a kaihhruai theih loh. Politics hi dâwt leh thu dik chanvea kalpui chi a ni lo a, chung lamin thu tak a duh a, dikna a duh a, chumiah chuan din hram hram kan tum tur a ni," a ti.
MPCC President sawi danin, Mizoramin eirûk thubuai nei lai Chief Minister leh minister a nei mek a, Congress sorkar liam taa MLA zingah eirûk thubuai nei an awm lo. Lal Thanhawla chuan, Congress-in Mizoram tan rotling tam tak an siam nia sawiin, "He ram tan hian malsawmna kan ni nasa khawp mai. Kum 20 rambuaiah kan awm a, kan mamawh ber chu remna leh muanna a ni. Congress party-in kan sorkar nam thluin, lalṭhutthleng kan kian a, remna a awm thei a. Chhuan tam tak lo la awm tur thlenga hnam ro tling eng emaw zat kan siam a, party dang siam a awm meuh lo," a ti.
Sorkarin ṭanpuina a pek tawh mi rethei zawkte bank account aṭanga MNF sorkarin pawisa a chhuhsak leh chu Mizoram mipui mak tih a ni tih sawiin Lal Thanhawla chuan, "Sorkarin ṭanpuina a pek tawh mi rethei zawkte account aṭanga pawisa lak let leh duhnate hi mi náwlpui chuan mak kan ti mai thei, mahse, MNF tih atan chuan a mak lo, an tih âwm tak an ti a ni," a ti a; MNF sorkar chu ni ṭha lo atana roreltu an nih lohna turin nasa taka ṭan an lak a ngaih thu a sawi.
MPCC thuchhuah chuan, nimina an party inkhawmah hian MNF Legal Board secretary ṭhin Lalremtluanga, advocate chu Congress party-ah lawm luh a nih thu a tarlang.