Central aṭanga sum hmuh loh vangin FWG-te'n thla 5 hlawh an la tawh lo

Environment, Forest & Climate Change (EFCC) department hnuaia Forest Wildlife Guard (FWG)-te chuan thla nga chhung hlawh an la thei tawh lo. 

Principal chief conservator of forest (PCCF) Dr Ch Muralidhar Rao chuan, sorkar laipui aṭanga sum an hmuh theih loh vanga hlawh pe thei lo an nih thu a sawi.

Vanglaini palai zawhna chhangin Dr Ch Muralidhar Rao chuan, FWG-te chu Centrally sponsored scheme (CSS) hnuaia mi an nih thu sawiin, "Thil dangah pawh CSS hnuaia kan sum hmuh tur ang kan la hmu lo a, chuvangin, FWG-te hlawh tur pawh hi kan la pe thei lo. FWG-te hlawh hi central-in 90% leh state-in 10% an tum a ni," a ti. 

PCCF chuan, tunah hian CSS atana an sum dawn turte an hmuh theih nan sorkar laipui dàwr mek a nih thu sawiin, "Thu chiang kan hriat veleh hmalak dan tur kan ngaihtuah ang," a ti a; thu chiang hriat a nih hunah hmalak zel dan tur an ngaihtuah tur thu a sawi.

Nikum lamah pawh CSS atana sum an dawn tlai avangin state sorkar sum an pûk thu sawiin Dr Ch Muralidhar chuan, "CSS sum kan hmuh veleh state sorkar sum kan pûk kan rûl leh a ni. Tun ṭumah pawh hian CSS sum kan hmuh lawk loh chuan state sorkarah pûk kan dil ang," a ti.