KHAWTHLIR

Commerce & Industries department leh Mizoram Handloom, Handicrafts Research & Promotion Council-te chuan, nimin khan Vanapa Hall-ah Monsoon Handloom Fair 2019 an huaihawt ṭan a, Industrial Development Board vice chairman C Ramhluna'n a hawng. Fair-ah hian puantahtute'n dawr 36 an hawng a, Mizo puan leh Mizo puantah aṭanga thil dang siamte zawrh a ni a; vawiinah chhun­zawma khâr a ni ang.

Aizawl Traffic SP Rodingliana Chawngthu chuan nimin khan thupek chhuahin, Sikulpuikawn leh Khatla kâwn inkar kawngpui 'one way' atana enchhin chu kalpui chhunzawm zel tur a nih thu a puang. September 2-6 chhung khan Sikulpuikawn-Khatla kâwn inkar chu zing dar 9 leh chhun dar 11 inkarah one way atan enchhin a ni a, harsatna nasa takin a sukiang tih hriat a nih avangin September 9, 2019 aṭangin hman chhunzawm tura tih a ni.

Serchhip district magistrate Sangchhin Chinzah chuan September 5, Ninga­ni khan Tuichang lei enkawlna chungchang­ah Cr.PC Section 144 behchhanin khapna thupek a chhuah a; Tuichang lei chhak lam leh thlang lam metre 100 huam chhungah lung hâlna hmanga lung lâk a khap. Tuichang leiah motor rihna leh a thil phurh rih zawng belhkhawma ton 10 aia rit zawh leh leiah darkar khata km. 10 aia chaka tlân khap a nih thu a puang bawk.

Chalngura Jahau lehkhabu lehlin, 'DL Moody-a sermon hnuhnung ber' tih chu nimin khan Aijal Club-ah Rev.Dr Lalchungnunga'n a tlangzarh. Lehkhabu tlangzarhna inkhawm hi Chawnpui Presbyterian kohhran bialtu pastor Rev. T Lalthantluanga'n a kaihruai a ni.

National Disaster Response Force (NDRF) leh Aizawl District Disaster Management Authority (ADDMA)-te chuan, nimin khan Pachhunga University College-ah 'Familiarization Exercise on Disaster Management' programme an hmang a; ADDMA Quick Response team-te'n khuarel chhiatna thlen chânga thil pawimawh hrang hrangte PUC Youth Adventure Club member-te an zirtir.