Health Minister-in Lungleia kohhran Damdawi-inte thawhpuiah a sáwm

Health minister Dr R Lalthangliana chuan September 5, Ningani khan Lungleia Mizoram Synod damdawi-in, John Williams Hospital leh Baptist kohhran damdawi-in Christian Hospital-te a tlawh a; AB-PMJAY leh MSHCS-te hlawhtling taka kalpui a nih theih nan thawhpuiah a sáwm.

Dr R Lalthangliana hian John Williams Hospital leh Christian Hospital hotute a kâwm a; Ayushman Bharat Pradhan Mantri Jan Arogya Yojana (AB-PMJAY) leh Mizoram State Health Care Scheme (MSHCS)-te chu October 1, 2019-ah kalpui ṭan a nih tur thu sawiin, health care scheme pahnihte hi mipui tan hlawhtling taka kalpui a nih theih nan hmalakpuiah leh thawhpuiah a sáwm a ni.

AB-PMJAY-ah hian damdawia inenkawlnaah chhungkaw pakhatin kum khatah Rs. 5,00,000 thleng an bill thei a; a huamte chu, Ministry of Rural Development hnuaia Socio Economic Caste Census (SECC), 2011 deprived list (chhungkaw harsa leh hnuaihnung)-a telte leh kum 2018-a RSBY hnuaia smart card neite an ni. Inziak lutte tan pawisa pe nghal lo (cashless)-in damdawi-inah inenkawl theih a ni.

October 1 aṭanga kalpui ṭan tur MSHCS-ah chuan kum khatah chhungkaw pakhatin damdawia inenkawlna senso Rs. 2,00,000 thleng an hmu lêt thei dawn a, AB-PMJAY hmang ve thei lote tan inziah luh theih niin, Mizoram chhung bakah, phai lama inenkawlnate pawh a huam tel. Inziah luhna atan kumin September - November chhung hun hawn a ni dawn. MSHCS-a inziah luh nan BPL chhungkaw tan Rs. 100 leh APL chhungkaw tan Rs. 1,000 sen a ngai a ni.

Minister Dr R Lalthangliana hian Ningani vêk khan Lunglei KVI Office-a KVI Emporium a tlawh bawk.