Minister-in hmeichhe boxer-te a lawmpui

Sports & Youth Services minister Robert Romawia Royte chuan nimin khan a pisaah August 9-18, 2019 chhunga neih World Police & Fire Games, Chengdu, China-a India aiawha medal latu pathum Vanlalduati (BSF), Lalbuatsaihi (SSB) leh Lalfakmawii Ralte (SSB)-te chawimawina hun a buatsaih a, Mizoram sorkar aiawhin lawmpuina thilpek a hlan.

Robert Romawia chuan, Mizo hmeichhe boxer Vanlalduati, Lalbuatsaihi leh Lalfakmawii Ralte ten khawvel huapa hlawhtlinna neia medal an la chu a lawmpui thu sawiin, "India flag hnuaia international level-ah medal la tlemtê zinga in tel thei hi thil ropui leh chhinchhiahtlak a ni," a ti a; Mizo infiammite hmasawn zel nan sorkarin hma a lak zel dawn thu a sawi.

World Police Games & Fire Games-ah hian ram 79 aṭangin police leh dan kengkawhtu lama thawk infiammi 8,000 vel an tel a; Vanlalduati, Lalbuatsaihi leh Lalfakmawii Ralte te hian an category ṭheuhah gold medal an hnek chhuak a ni.