Core Committee-in Zophaia mosque ṭhiah a nih theih nan hmalak an rél
Mizoram leh Assam ramri ngaihtuahtu Core Committee September 6, 2019-a an chairman Lalnunmawia Chuaungo, chief secretary hoa ṭhukhawm chuan, Bairabi Zophaia Mosolman-te'n mosque (biak-in) an sak mek ṭhiah a nih theih nan hmalak zel an rêl a; Environment, Forest & Climate Change (EFCC) department-in mosque sak titawp turin hriattirna pe se, zawm a nih loh chuan na zawka hmalak ni se, an ti.
Vanglaini palai zawhna chhangin Core Committee member L Ramdinliana Renthlei, MZP president chuan, meeting-ah hian Zophaia Molsolman-te'n mosque an sak chungchang sawi lan a nih thu a sawi a, "He lai hmun hi Forest Reserve Area a ni a, a tumah mahin khawih loh tura tih (status quo) maintain tur a ni. Mosque hi ṭhiah tura tih a ni a, an sa chhunzawm zel a nih chuan police ṭhahnem zawk dah belh lailâwk a, a ṭul anga hmalak zel ni se tih a ni," a ti.
Meeting-ah hian Zophaia mosque sakna hmun chu Mizoram chhung a nih thu tarlan a ni a; status quo maintain tur a nih avang leh dan loa mosque sak a nih vangin EFCC department-te chu mosque satute hna thawk tawh lo tura hriattirna pe tura tih an ni. Hriattirna pek a nih hnua awmzia a awm lo a nih chuan, Home Minister hoa sawihoin Mizoram Police leh EFCC department ṭangkawpin mosque sak mek chu ṭhiah a nih theihna atana hmalak ni se, an ti.
Mizoram leh Assam ramri chungchang document an neih angte leh an la neih loh an lak khawmte chiang zawka zir nawn leh ni se, an ti bawk a; a zir chiang tur an inruat nghal.
MZP aiawhte chuan, meeting hnuhnung berin, 'MZP-in sorkara document a thehluh Home department-in lo zir chiang se' a tih chu zir chian a nih tawh leh tawh loh an zâwt a; Home department aiawhte chuan, an la zir chian hman loh thuin an chháng.
MZP President chuan, an document thehluh an la zir chian hman loh thua an chháng chu an hrethiam lo hle tih sawiin, "Document kan neih ang angte kan thehluh Core Committee pawhin zir chiang tura a tih tawh zir chian a la ni lo hi ramri hi an vei tâwk loh vangah kan ngai," a ti.
Hetih lai hian, Zophai hmuna national highway kawngpui lai taka banner târin Mosolman-te chuan lirthei vei vakte hnenah donation an lo khawn ṭhin a; chumi chungchang chu Core Committee meeting-ah MZP hruaitute chuan dan kalh a nih thu an sawi chhuak a ni.