PHE leh Laltharzeli'n award an dawng

Laltharzeli, Mamit Bazar Veng chuan faina kawnga a thawh hlâwk avangin September 6, 2019 khan Vigyan Bhawan, New Delhi-ah National Award a dawng a; Mizoram PHE department pawhin ODF 4+1 IEC category-ah India rama state thawk ṭha ber lawmman Maharashtra state nen an dawng bawk.

Laltharzeli hian faina kawngah hma a la nasa hle a, PHE department-te chuan ambassador-ah hmangin, Mamit khawpui leh district chhunga thingtlang khaw hrang hrangah faina kawnga hma latu tur Children Sanitation Club (CSC) 85 a din tawh. CSC a din hmasak ber, Mamit Bazar Veng chu kum thum chhung kalpui a ni tawh a, chawlhkar khatah vawi hnih faina hnatlang a neihpui ṭhin.

Faina kawnga a thawh hlâwkna leh hmalakna avangin Laltharzeli chu Mizoram sorkar leh department chuan Ministry of Drinking Water Jal Shakti hnuaiah award dawng turin an chhawp chhuak a ni.

Award hlanna inkhawmah hian President Ram Nath Kovind pawh a tel a, sorkar laipui hnuaia hmalakna tihlawhtling turin mipui an pawimawh thu a sawi. Ministry of Drinking Water Jal Shakti minister Gajendra Singh Shekha Wat pawhin thu sawiin, "Mimal tlawmngai te, sum leh pai beisei loa thawktute avangin India ramin faina lamah hma a sawn zel a ni," a ti a; mi tin an hrisel zawk nan leh tui in turte a thianghlim zawk theih nan  faina kawngah theihtawp chhuah lehzual turin India mipuite a sáwm a ni.