CM-in Shillong leh Guwahati-a Sorkar hmalak meknate a tlawh

Chief minister Zoramthanga chuan September 7, Inrinni zing khan NEIGRIHMS, Shillong-a damlo inentirte chawlhbûk tur Patients' Lodge sakna hmun tur, Mawkasiang-a mi chu a tlawh a, PWD architect-te nen in sak dan tur an en. Tlai lamah Six Mile, Guwahati-a damlo chawlhbûk sakna hmun tur leh Mizoram House sak belhna tur hmun a enfiah bawk.

CM Zoramthanga chuan, Mizoramah damlo inenkawlna duhthusama a la ṭhat tâwk loh avangin inenkawlna ṭha zawk dawng turin mi tam tak state páwnah an kal ṭhin tih sawiin, "Mizoram House hi an tlûk luhna ber a nih ṭhin avangin damlote dâwl zo zawk turin damlo tam takin an pan ṭhin NEIGRIHMS, Shillong bulah Patients' Lodge sa tura ruahmanna siam a ni. Zin veivâk dangte tan pawh a nawm zawk nan Mizoram House hrang hrangte chu a remchan ang zela thawm ṭhat leh sak ṭhat sorkarin a ngai pawimawh," a ti.

Patients' Lodge sak tur chu pindan 40 awm tura ruahman niin, a sakna tur hmun chu ft. 360 X 253 X 270 X 392-a zau a ni a; enkawltute chênna tur leh ṭul dangte pawh a remchan anga sak belh zel tum a ni. A hmun hi March 20, 2014-ah Meghalaya sorkar aṭangin luah phalna hmuh a ni. Chief Minister chuan, a sak hna ṭan thuai a nih theih nana hmalak tur pawimawhte tifel vat turin PWD hotute a hrilh.

CM Zoramthanga hian Shillong Mizoram House awm mekna hmuna mikhual, hmeichhia 30 leh mipa 30 lenna tur sak mek pawh a enfiah nghal a ni. Chief Minister hian chawhnu lamah Guwhati-a Mizoram House sak belhna hmun tur a tlawh a, damlote hman tur a ni tih rilrua hre chungin an tana remchang thei tur bera sak chhunzawm ni se, an ti. House sak belhna tur hi in rel ding lai a ni a, metre 26.95 X 14.45-a zau, chhawng thum a ni. Guwahati-ah hian Chief Minister hi Lok Sabha MP C Lalrosanga'n a ṭawiawm.