Bru hruai kìrte a huhoa awmtir turin MP-te'n CM an ngensak

India ram state pathuma Member of Parliament (MP) 11-te chuan chief minister Zoramthanga hnenah memorandum thehlutin, Tripura refugee camp-a Bru, Mizorama kîr turte a huhoa awmtir turin an ngensak.

MP-te chuan an memorandum-ah hian, Bru-te chu kum 22 liam taah khan Mizoram aṭangin Tripura ramrìah dah an nih thu tarlangin, "India ram hmun hrang hranga awm mi 125 aia tamin Bru-te hi venhimna pe tur te, a tlem berah chhungkaw 500 tal a huhoa awmtir turte leh ram acre 5-a zau tal an din khawchhuahna atana pe turin kan ngen che a ni," an ti.

Memorandum-ah hian Madhya Pradesh MP pakua leh Delhi leh Maharastra MP pakhat ve vein hming an ziak a ni. Tarlan tawh angin, Ministry of Home Affairs (MHA)-in a din Joint Monitoring Group (JMG) member-te September 6, 2019-a New Delhi-a MHA pisaa ṭhukhawm chuan, Tripura-a ráltlân Mizoram Bru-te chu October 1, 2019 aṭanga lak let ṭan turin a rél.