ZMC-ah MBBS seat hnawhkhah a ni

Zoram Medical College (ZMC)-ah kum 2019-20 aṭanga zir thar turte chuan admission an ti zo tawh a, seat awm zawng zawng hnawhkhah a ni tawh.

ZMC hotute hnen aṭanga thu dawn danin, ZMC-ah hian first year zirlai lut tharte pualin August thla khan Medical Council of India curriculam angin foundation course neih a ni a, chumi hnuah, September 2 aṭang khan regular class ṭan a ni. Class hi harsatna awm loin, tluang takin kalpui mek a ni.

Zirlai lut tharte pualin August 2019 chhung foundation course neih ni mah se, seat awm zat 100 chu hnawhkhah nghal a ni lo a; central pool-ah Mizoramin MBBS seat a hmu lo tih a chian hnuah, central pool nghak zirlaite chu admission tihtir leh niin, seat awm zat chu hnawhkhah a ni ta a ni.

Mizoramin medical college a neihchhun hming, Mizoram Institute of Medical Education and Research (MIMER) tih chu kumin tìr lama Mizoram sorkarin Zoram Medical College tia a thlak hnuah pawh hun rei tak chhung chu Medical Council of India lamah chuan MIMER tih a la ni reng a; chutih rualin, MCI pawhin tun hnai khan MIMER hming thlakna ZMC tih chu a pawm a, an website-ah pawh Zoram Medical College tiin an ziak tawh a ni.