KHAWTHLIR

Mizoram Law Commission chairman thar atan Mizoram Judicial Service (Rtd) Lal-a Khobung ruat a ni. Law Commission Chairman thar ruatna hi Mizoram sorkar chuan tun hnai khan a tichhuak a, thu leh awm hma chu a chelh ang. Law Commission chairman hian thla khatah Rs. 30,000 a hlawh dawn a ni.

Inrinni khan Mizoram Gorkha Youth Association (MGYA) chuan Aizawl Civil Hospital tan thisen unit 61 an pe a, petute mipa 58 leh hmeichhia pathum an ni a; Chawlhhmun Branch YMA chuan an din champha vawi 38-na pualin Synod Hospital tan thisen unit 43 pein, a petute mipa 42 leh hmeichhia pakhat an ni. KeiṬum Bial KṬP-in Serchhip District Hospital tan unit 29 pein, a petute mipa 23 leh hmeichhia paruk an ni a; LIKBK Ṭhalai Pawl, College Veng pastor bialin Lawngtlai District Hospital tan unit 33 an pe a, a petute mipa 22 leh hmeichhia 11 an ni.

Malsawmkimi, Lunglawn, Lunglei lehkhabu ziah 'Fianthlir' tih chu September 6, Zirtawpni khan Lunglei District MJA president H Lalthansanga'n BCM Lunglawn pastor quarters committee room-ah a tlangzarh. Lehkhabu hi phek 54-a chhah niin, Rs. 70 man a ni.

September 7, Inrinni tlai khan Lalnunthari (4) d/o Biaklawma, Dapchhuah khua chu an khaw bula Dâpluiah chesualin a tla a, Inrinni zanah tlaivara zawn a nih hnuah, niminah pawh zawn chhunzawm a ni a, he thu ziah lai thleng hian hmuh a la ni lo. Lalnunthari zawnnaah hian Dapchhuah bakah, Dilzawl, Phaizau, Mamit, Dàmpui, West Phaileng, Rawpuichhip leh Lengpui aṭangtein mi ṭhahnem tak an thawk chhuak a; bialtu MLA H Lalzir­liana pawhin hna­tlangte tlawhin, pawisa leh silpauline paruk a pe a ni.

Health & Family Welfare minister Dr R Lalthangliana chuan chuan September 7, Inrinni khan sawi lâwk loin Aizawl Civil Hospital (ACH) a tlawh. Minister hian ACH-a department zawng zawng tlawh chhuakin, an hnathawh dan leh dinhmunte a enfiah a, thawktute'n harsatna an neihte a ngaihthlaksak. Health Minister hi Health principal director Dr F Lallianhlira leh hotu dangte'n an ṭawiawm a ni.