NEC Plenary Meeting-ah CM Zorama a tel

North Eastern Council (NEC) Plenary Meeting vawi 68-na chu nimin khan Assam Administrative Staff College, Guwahati-ah ṭan a ni a, chief minister Zoramthanga pawh a tel.

NEC Plenary Meeting hi Union Home minister Amit Shah, NEC chairman ni bawkin a kaihruai a; minister of state for DoNER Dr Jitendra Singh, NEC vice chairman ni bawk leh NEC member dang - hmar­chhak state hrang hrang Governor leh chief minister-te leh member dangte an tel bawk. Hmarchhak state pariat Governor leh chief minister ṭheuhin thu an sawi.

Chief minister Zoramthanga chuan, Planning Commission liam ta hnuaia din SP Shukla Committee-in NEC chu North Eastern Development Council tia thlak a, India hmarchhak state-te tana ṭha zawka thawk tura dinhmun pawimawh leh chak zawka siam rawtna a lo thlen tawh chu a thlàwp thu a sawi a; chumi atan chuan ngaihtuahna zau zawk sen ni se, tiin a rawt.

Zoramthanga chuan, Gross Budgetary Support (GBS) 10% leh Non-Laps­able Central Pool of Resources (NLCPR) kalphung chu India hmar­chhak state-te'n an ṭangkaipui em avangin sorkar laipuiin tidang­lam lo se a duh thu a sawi a; tun hnaiah GBS 10% leh NLCPR kalphung chu pawlh dal tial tial nia a lan thu sawiin, project kal lai mek leh a dang ṭhenkhat tih loah chuan funding chu hmun tam takah tihtawp a nih avangin, a aia scheme ṭha zawk duang tura hmalak a beisei thu a sawi bawk.

NEC scheme chungchangah Zorama chuan, kum 2017-18 aṭanga 2019-20 chhung atana hmarchhak state zawng zawngin an hman tura cheng vbc. 4500 dah a ni chu hmar­chhak state pariat tan duhthusam a tlin loh thu sawiin, "He pawisa dah hian project kalpui mekte leh leiba rulhna turte chauh a huam a, project thar siamna tur a ken tel loh avangin hmasawnna thar neih a harsa dawn," a ti a; External Aided Project (EAP) hnuaia project phalna neih a harsat thu leh EAP approval process thui lutukin harsatna a thlen ṭhin thu a tarlang.

CM Zoramthanga chuan, hmarchhak state-ah kawngpui siam leh in sak (construction work) man a to hma ṭhin bik avangin hmun dangte aiin hmasawnna hna a chak tâwk loh ṭhin thu a sawi a; chumi chung­changa harsatna awm ṭhin chu sutkiansak turin Home Minister a ngen. Act East Policy chu sorkar laipuiin ngai pawimawh viau mah se, a luhká hmar­chhak state zingah hmasawnna langsar hmuh tur a tlem thu te, Act East tur chuan Act North East hmasak a pawimawh thute a sawi bawk.

NEC Meeting-ah hian thu an ngaihtuah zingah project kal mek hrang hranga hmalakna leh harsatna te, March 2020-a 14th Finance Commission term a ral huna hmalak zel dan turte a tel. Meeting-ah hian hmarchhak state-a chief secretary-te leh Planning secretary-te an tel a, Mizoram aṭang pawhin CS Lalnunmawia Chuaungo, Planning secretary Dr C Vanlalramsanga leh official dangte an tel. Vawi­inah chhunzawm a ni ang. NEC hi kum 1971-ah din a ni a; hmar­chhak state pariat - Arunachal Pra­desh, Assam, Manipur, Meghalaya, Mizoram, Nagaland, Sikkim leh Tripura te tihmasawn tura nodal agency a ni.