SSG 2019 hawn a ni

India ram pum huapa thingtlang khaw fai inelna, Swachh Survekshan Grameen 2019 chu September 6, Zirtawpni khan Kolasib leh Lawngtlaiah hawn a ni a, Swachh Prerak Day hman nghal a ni. 

Hawnna inkhawm hi Kolasib-ah chuan St.Joseph’s Parish Hall-ah hman a ni a, minister of state K Lalrinliana, bialtu MLA ni bawkin a hawng. K Lalrinliana chuan sorkar laipuiin faina leh thianghlimna a vei tih sawiin, "Mizoramah pawh faina kawngah nasa takin hmalak chhoh a ni a, hemi kawnga hmasawnna kan neihte hi thil chhin­chhiah tlak tak a ni," a ti.

K Lalrinliana chuan PHE  leh UDPA department-te chu thingtlang leh khawpuia Swachh Bharat hmalakna kengkawhtu, mipui zirtirtu an nih thu sawiin, "Kawng hrang hrangin sorkar, pawl leh khawtlang ang­ten hmalakna a awm a, faina leh thianghlimna pawimawhnate kan hre chho zel hi lawmawm,"  a ti a, faina emaw thil dang­ah pawh sorkar hma­lakna reng rengah mipuite'n mawhphurhna an neih tel ve thu a sawi.

Inkhawmah hian Kolasib district-a khaw endik hmasaka pakhatna Phainuam, pahnihna Serkhan leh pathumna Phaisen-te hnenah lawmman hlan a ni. Lawngtlaiah chuan DC conference hall-ah Lawngtlai District Water & Sanitation Committee buatsaihin hman a ni a, Lawngtlai additional DC B Lalchhawntluanga'n a hawng.