Dan loa khaw dinte enfiah a ni dawn

Dan loa khaw din chungchanga hma la tura sorkarin a din Joint Inspection Team chu September 6, Zirtawpni khan Team chairman Henry C Lalráwnkima, Tlabung SDO (Civil) kaihhruaiin an ṭhukhawm a, hmalak zel dan tur an ruahman.

Henry C Lalrawnkima chuan, dan loa khaw din chu sorkarin a ngaimawh tih sawiin, ṭhiah a nih theih nana hmalak kawngah erawh fimkhur taka kal a ngai tih a sawi a; meeting-a telte chu ngaihtuahna fím hmang tur leh dan loa chêt theihna laka inveng turin a chah.

Ṭhutkhawmnaah hian, dan loa khaw din nia hriat enfiah tur chin leh enfiah dan tur sawiho a ni a; Joint Inspection Team-te chu dan loa din nia hriat khaw hrang hrangah an kal ang a, chhungkaw awm zawng zawng aṭanga 15% vel zel kâwmin, hriat duh an neihte an zâwt dawn a, an awmna khaw awptu V/C leh mipuite pawh an kâwm dawn a ni.

An ruahman dan chuan, September 9-11 (vawiin aṭanga Nilaini thlengin) chhungin Khawthlangtuipui ràl lehlama dan loa din nia hriat khaw hrang hrangte Joint Inspection Team chuan an tlawh dawn a, September 16-18 chhungin Zohmun leh Khojoysury lam an fang veleh thung ang.

Joint Inspection Team-ah hian Tlabung SDO(C) chu chairman niin, Lungleia DLAO office-a assistant field inspector chu member secretary a ni a; Lungleia Revenue Settlement officer, Tlabung DFO, Tlabung SDPO, Tlabung V/C President leh Tlabung Branch YMA President-te bakah, Lunglei YMA Sub-Hqrs YMA leh MZP leh MSU aiawh an tel bawk.

Inspection Team-in khaw hrang hrang an enfiahnaa an thil hmuhte chu Lunglei District Level Screening Committee-ah September 2019 chhung ngeia thehluh hman tum a ni.