Mizoram Household Regsitration Bill pawm turin NEFIP-in Governor an ngen
India hmarchhak state pasariha pawl hrang hrang intél khawm, North East Forum for Indigenous People (NEFIP) chuan Mizoram Governor Jagdish Mukhi chu Mizoram Household Registration Bill, 2019 pawm thuai turin an ngen.
NEFIP hian September 4-6, 2019 chhung khan Aizawlah inkhawmpui an hmang a; an thurel zingah, 'March18, 2019-a Mizoram Assembly-in a pawm tawh Mizoram Household Regsitration Bill, 2019 chu pawm thuai turin leh mipui thlan Assembly member-te kutthlakna zah turin Governor kan ngen a ni,' tih a tel.
NEFIP chuan, India hmarchhak state sorkar zawng zawngte chu Mizoram Assembly dan siam ang chi, tualṭo hnamte humhalhna tur dan siam vek turin a ngen a; Assam sorkarin a buaipui mek National Register of Citizens (NRC) ang chi pawh hmarchhak state zawng zawnga hman ve a nih theih nan state Assembly-te chu dan siam ve turin an ngen bawk.
Manipur People Against Citizenship Amendment Bill 2016 (MANPAC) hmalaknaa din NEFIP hian January 27, 2019 aṭang khan Citizenship Amendment Bill dodal turin ke a pên ṭan a, hmarchhak state hrang hrang an tlawh kual hnuah, Mizoramah inkhawmpui an nghat a ni.