Ṭhuampui-Chawlhhmun & Durtlang-Kulikawn inkarah cable car siamna tur ruahman a ni

Chief minister Zoramthanga chuan January 21, Thawhlehni khan (National Institution for Transforming India) NITI Aayog vice chairman Dr Rajiv Kumar chu New Delhi-a a pisaah a kâwm. Aizawla aerial cable car siam rawtna awm tawh chu tihpuitlin theiha ngaih a nih thu leh, sum mamawh tur ruahman nghal a nih thu Dr Rajiv Kumar chuan a lo hrilh.

Mizoram sorkar thuchhuah tarlan danin, CM Zoramthanga hian NITI Aayog Vice Chairman chu Mizoram hmasawnna tur thil pawimawhte a sawipui a ni. Mizoram sorkarin Aizawl khawpuia mipui veivahna lirthei (public transportation) indaih lohna tiziaawm tura aerial cable car (boruaka hrui hmanga mihring chuan theihna) siam tura rawtna a lo thlen tawh chu NITI Aayog-in an zir chian hnuah siam theih ngei nia ngaih a nih thu leh, sum mamawh turah pawh ruahmanna siam nghal a nih thu NITI Aayog Vice Chairman chuan Chief Minister a lo hrilh a ni.

Aizawla mipui veivahna hman mek - bus leh taxi ten mipui mamawh a phuhrûk zawh tâwk loh avang leh, mahni leh mahni inchâwm zo thei tur public transport dang, kawngpui titâwt zualtu ni si lo tur ruahmanna Mizoram sorkarin a lo siam tawh a; chu'ng zingah chuan cable car pawh telin, siam a nih theih nan NITI Aayog-ah rawtna a lo thlen tawh a ni.

NITI Aayog Vice Chairman chuan, sorkar laipui ministry hrang hrang ko khawmin, cable car atana rawtna chu tihhlawhtlin theih dan tur sawiho a nih tawh thu te, sum mamawh tur pawh ministry pathuma secretary-te'n a lâk khawm dan tur ngaihtuahin, ruahmanna an siam tawh thute CM Zoramthanga a hrilh.

Ruahmanna ang chuan, cable car chu Ṭhuampui aṭanga Solomon's Temple, Chawlhhmun (east-west corridor)-a kal leh Durtlang aṭanga Kulikawn (north-south corridor)-a kal tura tih a ni.

Aizawla cable car service siam chu a remchan dan leh tih theih dan tur zir chianna (feasibility study) neih a ni tawh a, final report duang turin NITI Aayog-in a rawih Ernst and Young mithiamte kar leh lamah Aizawla an kal nghal tur thu Dr Rajiv Kumar chuan a sawi.

Aizawl chung boruaka veivahna siam chungchangah Mizoram sorkar chuan hma a lo la tawh ṭhin a, tihpuitlin erawh a la awm lo.

Urban Development and Poverty Alleviation (UDPA) department-in kum 2016 vel khan Aizawlah ropeway siam tumin hma a la tawh a, ropeway siam ṭhin Doppel­mayr Garaventa Group India hotute pawh chah chhuah a ni tawh. Asian Development Bank (ADB) kaltlangin ropeway project buaipui a ni tawh bawk.

Ministry of Urban Development bultumin ADB-in Mizoram sorkar chu report, '8765 IND: Supporting Sustainable Urban Transport in Aizawl City' tih a siamsak tawh a; chumi hmang chuan UDPA-in Ministry of Urban Development remtihnain survey neih tawh a ni. Rua­hman chhinnaah route pathum - Ṭhuampui-Solomon’s Temple (km. 5.5), Ṭhuampui-Chief Minister's Office (km. 2.4) leh, Durtlang-Zemabawk (km. 7.5)-te a tel.

Mizoram sorkara Tourism department pawhin khualzin hîpna atan ropeway project a lo nei tawh bawk a; chutah chuan Durtlang leh Chaltlanga Tourist Lodge inkarah siam tum niin, Durtlanga KV Multipurpose School bul­ah leh Chaltlanga Tourist Lodge kawtah ropeway hrui ban phunna tur pawh laih a ni a, tihpuitlin a la ni lo.

Chief Minister leh NITI Aayog Vice Chairman inkawmnaah hian bamboo link road chungchang pawh sawi a ni a; 10% Gross Budgetary Scheme hnuaia hmarchhak state-te tana sum dah, khawih chêt loh chu a rang lama hmasawnna hna thawh theihna tura pek chhuah a nih theih nan hma la turin Chief Minister chuan NITI Aayog Vice Chairman a ngen.

CM Zoramthanga hi Planning Board vice chairman H Rammawi, Planning secretary Dr Vanlalramsanga leh sorkar official dangte'n an ṭawiawm a ni.

Aizawla cable car siam tumnate

•    NITI Aayog Vice Chairman-in Aizawlah aerial cable car (ropeway) siam theih a nih thu leh, sum mamawh tur ruahman nghal a nih thu CM Zoramthanga a hrilh.

•    Aerial cable car hi Aizawl khawpui tihtâwt belh si loa mipui veivahna siam belhna tura ruahman a ni a, Mizoram sorkarin NITI Aayog-ah rawtna a thlen.

•    Ṭhuampui-Chawlhhmun leh Durtlang-Kulikawn inkarah cable car siam turin ruahmanna siam a ni.

•    NITI Aayog aiawhte'n an zir chiang tawh; final report siamna turin Ernst and Young mithiamte'n an enfiah leh dawn.

•    Aizawl chung boruakah veivahna (cable car/ropeway) siam tumin Mizoram sorkarin hma a lo la tawh ṭhin.

•    UDPA department-in kum 2016 velah ropeway siam ṭhin Doppel­mayr Garaventa Group India hotute a chah chhuak.

•    UDPA hnuaia ruahmannaah Ṭhuampui-Solomon’s Temple, Ṭhuampui-CMO (km. 2.4) leh, Durtlang-Zemabawk (km. 7.5)-te a tel.

•    Tourism department pawhin khualzin hîpna atan ropeway project an nei; Durtlang leh Chaltlang inkarah siam tumin, KV Multipurpose School bulah leh Tourist Lodge, Chaltlang kawtah ropeway hrui ban phunna tur laih tawh a ni.