AMC inthlan turah candidate 66 Political party paliin an chuh dawn

AMC inthlan chuh tumte tan January 28, Ningani thleng khan hming pek luh theih a ni a, mi 66-in hming an pe lut. Nomination paper-te chu nimin khan endik a ni a, hnâwl awm loin pawm vek a ni. Inhnûkdâwk leh duhte tan February 1 thleng inhnuhdawh theih a ni ang. 

Political party pathum - Indian National Congress (INC), Mizo National Front (MNF) leh Zoram Peoples' Movement (ZPM)-te chuan ward awm zawng zawng (19)-ah candidate an nei kim. BJP chuan ward pakua an chuh dawn a, ward no. I, III, IV, V, VI, VII, IX, X leh XI-ahte candidate an nei a ni.

BJP-in candidate an neihna ward zawng (ward pakua)-ah candidate pali an awm a, a bâk ward 10-ah chuan candidate pathum ṭheuh an awm dawn.

February 16, Thawhlehni zing dar 7 aṭanga tlai dar 4 thleng vote thlak a ni dawn a, vote tlate chu February 18, Ninganiah chhiar a ni ang. 

AMC inthlan turah hian AMC sorkar kal tawh pahniha councillor zinga mi pariatin tun ṭumah hian an chuh nawn dawn a, chu'ngte chu MNF councillor panga leh INC councillor pathum an ni. An zinga pahnih chu AMC sorkar hmasa ber (2010-2015)-a councillor ni tawh, term hnihnaa tling lote an ni bawk.

Candidate 66 zinga hmeichhe pahnih chu AMC sorkar pahnihna (2015-2020)-a councillor an ni a, kum 2015-a an tlinna hmeichhe ward chu tun ṭumah hian general ward ni tawh mah se, candidate ni zui lehin, mipate nen an inel dawn a ni. Tun ṭum inthlana hmei­chhe ward turte chu - III, VIII, X, XIV, XVI leh XIX-te a ni.