Mizorama lockdown kalpui hnuah NSS-te'n thisen unit 1,588 an pe

National Service Scheme (NSS) volunteer-te chuan State NSS Cell ruahman angin March 2020-a Mizorama total lockdown kalpui a nih ṭan aṭanga nimin thleng khan Mizoram pumah thisen unit 1,588 an pe tawh.

NSS chuan lockdown kalpui ṭan aṭanga thisen peka hma an lâk dan tarlangin, Covid-19 léng leh lockdown avangin thisen pe ṭhin páwl hrang hrangte'n thisen pek duh mah se pek mai a harsat phah tih an sawi a, "NSS-te pawh kan bâng chuang lo. Zirna-in zawng zawng khâr a ni a, NSS unit-te'n an institution-a blood donation camp an huaihawt ṭhinte tih theih a ni lo," an ti. 

NSS tarlan danin, mahni hmuna thisen pek a remchan loh avangin State NSS Cell-in thisen pek theih dan tur an ngaihtuah a; Aizawla NSS nei zirna-in 31-te'n a tahtawla thisen an pek dan tur an ruahman a ni. Lockdown hnua a hmasa ber atan April 9, 2020-ah Civil Hospital, Aizawl blood bank-ah thisen an pe ṭan a, nimin thleng khan Aizawl Civil Hospital bikah blood donation camp ṭum 25 huaihawt tawhin, thisen unit 1,278 an pe tawh a ni.

District danga blood bank-ahte pawh NSS chuan blood donation camp an nei ve bawk a; lockdown tirh aṭanga nimin thlengin district dangah NSS-te'n thisen 310 unit an pe tawh. Aizawl leh district danga thisen an pek zawng zawng chu unit 1,588 a ni.