AMC manifesto tihhlawhtlin kawngah MNF sorkar an hlawhchham - MPCC

Mizoram Pradesh Congress Committee (MPCC) Media depart­ment chuan, Aizawl Municipal Corporation (AMC)-a MNF sorkar kal ta chu an manifesto tihhlawhtlin kawnga hlawhchhamah an puh a; AMC hnuaia ward committee din chu Congress party-in thil pawimawh tak ni loa an ngaih thu an sawi bawk.

MPCC Media-te hian nimin khan Aizawl Press Club-ah thu­thar thehdarhtute an kâwm a; an chairman Dr Lallianchhunga chuan, November 11, 2015 khan MNF vice president Dr R Lalthang­liana'n Aizawl Press Club-ah AMC inthlana an party manifesto a puan thu sawiin, "Mipui hnena an inzawrhna tih tur hlâwm lian 19 a puang. Mahse, kum 5 zet AMC-a MNF-in ro an rèl chhungin an manifesto tihhlawhtlin an nei mang lo a, khawpui enkawlna leh tihhmasawnna kawngah an hlawh­chham let dêr a ni," a ti.

Dr Lallianchhunga chuan, kum 5 chhunga AMC an kalpui dan enin Aizawl hmasawn nan MNF chu Aizawl mipuiin an hnâwl a ngai nia sawiin, "AMC hi step chhe tê tê rem tur ringawta siam a ni lo. Aizawl khawpui tihmasawn tura state sorkar thunun phâk loh thuneihna sang tak nei a ni. Mahni inrêlbàwlna hranpa nei tura The Mizoram Municipality Act, 2007 hmanga din a ni," a ti a, khawpui hmasawn nan ruahmanna ṭha tak neitu Congress party an sorkar a ngaih thu a sawi.

MPCC Media Chairman chuan, AMC-a MNF sorkarin an mani­festo-a an tarlan loh Aizawl plastic free city-a nihtir an tum nia sawiin, "April 2019 velah hma an la hluai a, polythene micron 50 aia pan hman an phal lo thut a ni. Sumdawng ho polythene zawrh laite an mansak a, tualchhunga entrepreneur ṭhenkhatin sum tam tak séngin polythene thlakna tur bag siam chhuah hna an thawk ṭan chauh a, mipui kan inher rem dawn chauh tihah an hmalakna an chawlhsan leh daih a ni," a ti. 

MNF-in AMC Election 2015 manifesto tihhlawhtlin an nei lo nia sawiin Lallianchhunga chuan, "MNF kaihhruai AMC rintlak lohzia leh mipuia an inzawrhna an ngaih pawimawh lohzia a tilang," a ti a; AMC inthlanah tihhlawhtlin loh tur manifesto nei tawh lo turin MNF a chah.

MNF sorkarin kum 2007-ah The Mizoram Municipality, Act an siam tih sawiin Lallianchhunga chuan, "Kum 2008-a Congress party a sorkar khan ennawnin, Mizoram khawtlang inrêlbàwl dan mil turin a siamṭha a ni," a ti.

Dr Lallianchhunga sawi danin, kum 2007-a MNF dan siam chu India rama state dang, vai rama an tih dan entawna siam a ni a, ward committee siamin, VC thlak turin thuneihna pek a ni. Mithiamte'n VC tihbo chu Mizo khawtlang inrêlbàwl dan paih hlenna tura an ngaih avang leh vai ram angin Mizoramah kalpui tak tak theih a nih dawn loh avangin mipui thlan chhuahte awmna local council din an duh zawk.

Mizoramah kohhran, YMA leh pawl hrang hrangte chu VC ramri anga kalpui a nih avangin veng pathum aṭanga pariat inkar vel huam tur ward committee siam chu pawimawh viaua an ngaih loh thu sawiin Lallianchhunga chuan, "India danpuiin a sawi tel avangin neih loh ngawt erawh a rem lo. LC hi act leh rules-in mawhphurhna a pek angin kan hnam nun dan leh chìn dan mila veng chhung enkawltu a ni," a ti.

MPCC Media hruaitute chuan, mipuite thil chîk lo leh hre lo zawka ngaia ‘Kalphung thar’ tih hming pua thu sawi ṭhin politician ṭhenkhatte’n an sim a ngai nia sawiin, "Ward committee hi vairam khawtlang inrêlbâwlna tura din a ni a, tláng mite tana din a ni lo," a ti a; ward committee chu kalphung tibuaitu tura an ngaih thu a sawi a ni.

4    Kum 2015-a an manifesto-ah AMC inrêlbàwl dan tih ṭhat leh hnathawh endik tur pawl din an tum thu an tarlang a, sawi zui a awm lo.

4    Khawpui lûn laia free wifi dah an tum chu a ngaihna hre lo a, kum 4 an awm hnuah AMC inthlan dawn hnaih, kum 2020-ah khawpui tlangdung hmun ṭhenkhatah an dah. Cheng nuai 95 chuang an séng tawh a, hman tlâk a ni lo.

4    Mi rethei chenna in sak an tum a, hmalakna pakhat mah a awm lo.

4    Bus, maxicab park-na leh chhuahna tur fel taka ruahman an tum thu an sawi a, vawiin thlengin Dawrpui leh Zarkawt velah kan la inhâwr khawm reng.

4    Mizo tana ṭha leh him turin AMC Licensing Regulation siam rem an tum thu an sawi a, siam rem an tum dan chu Mizo tan a him tâwk lo tih hriain sumdawng pawlte'n an dodal.

4    Bawlhhlawh paih leh tihral dan ṭha zawk siam an tum thu an sawi a, Congress sorkarin cheng vbc. 40 vel séngin Aizawl Solid Waste Management Centre, Tuirialah a din pawh hmang ṭangkai thei loin, bawlhhlawh paih danah nasa takin mipui an bum.

4    MNF hian kum 2015 khan sewage/ drainage system ṭha zawk siam an tum thu an sawi a, drain awm sa siamṭhat hna pawh an thawk thei lo.

4    Hmun remchangah ropeway siam an tum thu manifesto-ah an tarlang a, kum 5 an sorkar chhungin Aizawlah AMC-in ropeway an siam lo.

4    An manifesto-ah hmun remchang apianga motor kawng chhawng (fly-over bridge) siam an tum thu an sawi a, Aizawlah AMC siam lirthei tlan theihna kawng chhâwng a la awm lo.

4    Thlanmualpui (common cemetery) siam an tum thu an sawi a, an siam lo a, hmalakna an nei tak tak lo.