COVID-19: Mizoram dinhmun Hripui vei mi 1 hmuh belh a ni
January 28, Ningani khan Mizoramah Covid-19 vei mi pakhat hmuh chhuah a ni a; nimin khan hripui laka fihlîm tawh mi panga chhuahtir an ni.
Covid-19 vei Ningania hmuh chhuah chu Rapid Antigent Test (RAT) hmanga hmuh niin, Durtlanga hmeichhia kum 33 mi a ni a; Aizawla private hospital pakhata inentir tura a kalna lama hmuh chhuah, hri a kaina hriat loh leh symptom nei lo a ni. ZMC laboratory leh TrueNAT-PCR hmanga sample endik zingah hripui vei hmuh a ni lo.
Covid-19 laka fihlîm tawh nimina chhuahtir mi panga chu Durtlang BSUP CCC aṭanga chhuak mi pathum leh SRH-ZMC leh ITI CCC aṭanga chhuak mi pakhat ve ve an ni.
Mizorama Covid-19 vei hmuh chhuah tawh chu mi 4,363 an ni a, mipa 3,192 leh hmeichhia 1,171 an ni. Nimin tlai dar 5 thleng khan mi 4,318 (98.97%) chhuahtir an ni tawh a, mi pakua (0.21%) thi tawhin, enkawl mek mi 36 (0.82%) an awm.
January 28, Ningani khan ZMC laboratory-ah swab sample 354, TrueNAT-PCR hmangin district pasarihah sample 69 leh RAT hmangin district pariatah sample 447 endik a ni a; sample endik zawng zawng chu 870 niin, chu'ng aṭanga Covid-19 vei hmuh chhuah mi pakhat chu 0.11% a ni.
January 28, 2021 thlenga Mizorama swab sample endik tawh zat chu 2,05,242 a ni a, chu'ng aṭanga Covid-19 positive mi 4,363 chu 2.12% a ni. Hripui vei hmuh tawh zinga mi 2,062 chu Mizoram chhunga kái an ni a, mi 2,301 chu Mizoram páwn aṭanga an rawn luh hnua hmuh chhuah an ni thung.