KHAWTHLIR

State NSS Cell bultumin NSS volunteer-te'n nimin khan Civil Hospital, Aizawl blood bank-ah thisen unit 38 an pe. Thisen petute hi Mamawii Higher Secondary School leh Mizoram University zirlaite an ni.

Mizoram Rural Bank (MRB) branch 89-na, Thingdawl Branch chu nimin khan MRB general manager Amal Chandra Sarkar-a'n a hawng. MRB hi September 27, 1983-ah Regional Rural Bank Act (1976) hmanga din a ni a, Mizorama RD block zawng zawngah branch an nei kim tawh a ni.

Aizawl district Municipal Election Officer chuan nimin khan AMC inthlanpui atana election observer turin Sports & Youth Services director Lalsangliana (phone no. 9436143012) leh SIRDPR director Lalhmunsanga Hnamte (phone no. 9436960325)-te ruat an nih thu a puang.

Nimin khan Mamit bawrhsap Dr Lalrozama hoin DC conference hall-ah Mamit district-a thuneitute an ṭhukhawm a, September 2020 thlenga bank hrang hrangte hnathawh dan an thlirho. 

State Election Commission chuan Darlawn Venghlun VC inthlan ṭhat hun tur a puang a, February 5, 2021-ah inthlan tur niin, vote thlâk zawhah vote chhiar nghal a ni ang. Darlawn Venghlun VC huam chungah Model Code of Conduct puan nghal a ni.

Nimin khan kum 2021-22 chhunga UPC North East India (NEI) General hruaitu turte thlan a ni a; superintendent atan Rev. R Lalrinsanga, secretary atan Rev. Zohmingthanzama leh treasurer atan Rev. Lalmalsawma Sailo te thlan a ni.

State Referral Hospital-ah nimin khan Covid-19 vei mi pathum dah luh a ni a, mi pakhat chhuahtir a ni thung. SRH-ZMC Bulletin tarlan danin, SRH-ah hian hripui vei vangin mi pasarih an awm mek a, Isolation ward-ah enkawl niin, harsatna lian tham nei leh oxygen mamawh an awm lo.