Health Care Scheme-ah Reliance-in Vbc. 7.41 an bá anga chhut a ni 'Bill pek tur chin kan pe vek tawh' - Reliance
Assembly session neih mekah Health minister Dr R Lalthangliana chuan ZPM Legislature Party leader Lalduhoma zawhna ziaka chhangin, Mizoram Health Care Scheme-ah Reliance General Insurance company-te'n damdawi-inah bá cheng vbc. 7.41 an la pe lo nia chhût a ni a, Reliance lam erawh chuan ba pek tur chin an pe kim tawha an insawi thu a tarlang.
Health Minister tarlan danin, Health Care Scheme hi kum 2008-09 aṭanga kalpui ṭan a ni. Mizoram sorkar chuan Reliance General Insurance nen Health Care Scheme kalpui turin kum 2008-09 atan inremna an ziak a; inremna ang chuan sorkarin Rs. 28,93,88,192-in Health Care Scheme a kalpui tura tih a ni.
Inremna angin Mizoram sorkar chuan Reliance hnenah Rs. 27,49,18,782 (95%) a pe a, a bâk 5% chu tehfung zawng zawnga sorkar a lungawi chuan third quarter zawha pek tura tih a ni.
Hun kal zelah Reliance chuan bill a pe ṭha thei lo a, policy tàwpah Rs. 16,93,09,922 a pe chhuak hman. Mizoram State Health Care Society chhinchhiah dan chuan, Reliance hian damlo mi 4,293-te bill-ah Rs. 7,41,22,682 pek chhuah tur an la neia chhût a ni.
Hetih lai hian, Reliance lam chuan inremna anga bill pek tur chin an pe vek tawh niin an insawi thung. National Insurance Company erawh chuan Health Care Scheme hnuaiah bá an nei tawh lo.
Reliance-in leibá an la neia chhut a nih dan chuan, Aizawl Civil Hospital-ah leibá an ngah ber a, damlo mi 1,097-te bill Rs. 1,69,00,238 an la bá. Mimal leh kohhran damdawi-inah chuan Nazareth Hospital-ah leibá an nei tam ber a, damlo mi 289-te MR bill Rs. 2,16,22,453 an la bá a ni.