Robert Romawia'n ramri chinfel tawh a ti hi a lungchhiatthlak - Sawivunga

Aizawl South-I bialtu MLA C Lalsawivunga chuan, Mizoram leh Assam ramri buai chu chinfel a la ni lo tih sawiin, tun hnaiah minister of state Robert Romawia Royte-in chinfel a ni tawh anga a sawi chu lungchhiatthlâk a tih thu a sawi.

January 28, Ningani khan Bethlehem Venga AMC Ward XVI-a ZPM campaign office a hawnnaah thu sawiin C Lalsawivunga chuan, "Ramri buaina boruak sáng chu dâi deuh mah se, ramri buai erawh chinfel a la ni lo," a ti a; minister Robert Romawia chu ualau taka mipui hmaa dâwt sawiah puhin, "Inthlan huna sorkarna chan loh hlauh vanga hre reng chunga thil ṭha ti ngam lo a, thil ṭha lo zawk tih luih tlat hi kan do tlat dawn a ni," a ti.

Inkhawmah hian ZPM general secretary B Lalchhanzova leh Ward XVI-a ZPM candidate R Lalawmpuii te pawhin thu an sawi a ni.

ZPM hmunpuia hruaitute chuan nimin khan AMC ward XIV-ah an campaign bawk a, vice president Lalthansanga hoin hruaitu eng emaw zat an tel. Lalthansanga bakah, an star campaigner TBC Lalvenchhunga leh ward XIV-a an candidate Ramthanzauvi ten thu an sawi a ni.

Lalthansanga chuan, MNF party-in kum 2015-a AMC inthlanah free wifi an tiam tih sawiin, "A tak tak a nih leh dâwt a nih tur mipuiin kan la hriat loh avangin an tlinpui a, vawiinah chuan eng mah a nih lohzia kan hre chiang tawh. MNF hian tlin lehna chance an nei tawh lo. Nikum lama an lungphûmte pawh vawiin thlengin bawngtuthlawh ha khat pawh an la chêk lo. Hmana kan hriat ṭhan MNF tho kha an la ni," a ti.