Chin Lushai Conference hmang

ZORO chuan nimin khan Aizawla an pisaah Chin-Lushai conference vawi 129-na an hmang a; ZORO awmna hmun dangahte pawh hman a ni bawk.

Chin-Lushai conference hi an treasurer Michael Lalthanmawia'n a kaihruai a, general secretary Moses Lalramchhana'n report pein, president R Sangkawia leh ZORO Ṭhalai president L Ramdinliana Renthlei ten thu an sawi.

R Sangkawia chuan, Chin Lushai Conference chu British-in Mizote an ṭhen darh hnua dah khawm leh tumna atana inhmuh khawmna a ni tih a sawi a, "Zo fate ṭhen darhin kan awm a, kan insuihkhawm lehna tura min beihpui nan January 29, 1892-a Chin Lushai Conference-in resolution an lo pass a ni," a ti.

L Ramdinliana Renthlei chuan, ZORO chu political party a ni lo a, khawvel hmun hrang hranga awm Zo fate insuihkawm a, rorelna pakhat hnuaia an awm theihna tura beitute an nih thu a sawi a, "Zo fate hi mi awpbehna hnuaia awm reng tur kan ni lo a, Pathian rin chhan chungin kan bei zel ang a, khawvela Zo fate hi rorelna pakhat hnuaia awmin kan la independent ngei dawn a ni," a ti.