National Girl Child Day 2021 puala intihsiakna lawmman sem

National Girl Child Day puala thlalaka inelna, Photography Competition buatsaiha lawmman dawngtute puanna leh lawmman semna inkhawm nimin khan Synod Conference Centre-ah neih a ni a; pakhatna chu Richard Zothankima Hrahsel, Chhinga Veng a ni.

National Girl Child Day hi January 24-ah hman ṭhin a ni a, Ministry of Women & Child-in a duan angin kuminah pawh January 21-26 chhungin kawng hrang hrangin hman a ni. Day puala thil an tih zingah, hmeichhe naupang puala thing phun te, TV-a video clip tihchhuah te, thlalaka intihsiak te,Civil Hospital, Aizawla nau piang hmeichhiate hnenah lawmpuina Rs. 2,000 pekte a tel.

Thlalaka intihsiakah hian thupui chu 'Hmeichhe naupang humhim la, zirtirna ṭha pe rawh' tih a ni a, mi 250 velin thlalak an thehlut. Pakhatna hnenah Rs. 10,000 hlan a ni. Pahnihna K Lalpekhlua, Serchhip Dinthar Veng hnenah Rs. 8,000 leh pathumna F Lalhmingchhuanga, Chanmari, Aizawl leh Zothankhuma, Kulikawn hnenah Rs. 5,000 ve ve hlan a ni bawk.

Intihsiakna hi State Resource Centre for Women (SRCW), Women & Child Development leh Mizo Photographer Society (MPS)-te buatsaih a ni a; lawmman sem inkhawm hi SRCW state coordinator Vanlalhriatpuii Renthlei-in kaihruaiin, Women & Child Development director Lallianpuii'n a hmanpui a ni.